दिलासा: नीरा खोऱ्यात मुसळधार पावसाची बॅटिंग; धरणांचा पाणीसाठा १८.२८ टीएमसीवर
नीरा खोऱ्यातील धरण क्षेत्रात मुसळधार पाऊस सुरू असून एकूण उपयुक्त पाणीसाठा १८.२८ टीएमसी झाला आहे. नीरा देवघर आणि गुंजवणीत पावसाचा जोर सर्वाधिक आहे.
स्थैर्य, फलटण, दि. ०७ जुलै : नीरा उजवा कालवा विभागांतर्गत येणाऱ्या धरण क्षेत्रात मुसळधार पाऊस सुरू असल्याने पाणीसाठ्यात मोठी वाढ झाली आहे. खोऱ्यातील चारही धरणांचा एकूण उपयुक्त साठा आता १८.२८ टीएमसी म्हणजेच ३७.८२ टक्क्यांवर पोहोचला असून शेतकरी आणि नागरिकांना मोठा दिलासा मिळाला आहे.
धरण क्षेत्रात मुसळधार पाऊस
नीरा देवघर आणि गुंजवणी धरण क्षेत्रात पावसाचा जोर अत्यंत तीव्र आहे. नीरा देवघरमध्ये १५८ मिलिमीटर पावसाची नोंद झाली असून एकूण पाऊस ७२१ मिलिमीटर झाला आहे. गुंजवणी धरण क्षेत्रात तब्बल १९७ मिलिमीटर पाऊस पडला असून एकूण पाऊस ६७७ मिलिमीटरवर पोहोचला आहे. तसेच भाटघरमध्ये ८४ मिलिमीटर तर वीर धरण क्षेत्रात ४० मिलिमीटर पावसाची नोंद झाली आहे.
पाणीसाठ्याची सद्यस्थिती
धरणांमध्ये पाण्याची आवक मोठ्या प्रमाणावर वाढल्याने साठ्यात वेगाने वाढ होत आहे. भाटघर धरणात ६.९५ टीएमसी (२९.५७ टक्के), वीर धरणात ५.०० टीएमसी (५३.९३ टक्के), नीरा देवघरमध्ये ५.०० टीएमसी (४२.६३ टक्के) आणि गुंजवणी धरणात १.३३ टीएमसी (३६.०४ टक्के) उपयुक्त साठा जमा झाला आहे. धरण क्षेत्रात सतत पाऊस सुरू असल्याने जलसाठ्यात सातत्याने वाढ होत आहे.
कालव्यातून विसर्ग सुरू
पाणीसाठ्यात वाढ होत असतानाच आवश्यकतेनुसार कालव्यातून पाण्याचा विसर्गही सुरू करण्यात आला आहे. नीरा डाव्या कालव्यातून ३०० क्युसेक्स आणि नीरा उजव्या कालव्यातून ७०२ क्युसेक्स वेगाने पाण्याचा विसर्ग केला जात असल्याची माहिती नीरा उजवा कालवा विभागाचे कार्यकारी अभियंता रा. पी. मोरे यांनी दिली आहे.
