एसटी प्रवाशांसाठी ‘एनसीएमसी’ कार्डबाबत महत्त्वाची अपडेट; रिचार्ज आणि सवलतीबाबत मोठा निर्णय
थेट WhatsApp वर मिळवा
एसटीच्या एनसीएमसी स्मार्ट कार्ड रिचार्जमधील फरक आणि तांत्रिक अडचणी दूर करण्यासाठी महामंडळाकडून नवीन मार्गदर्शक सूचना जारी.
स्थैर्य, सातारा, दि. १५ सप्टेंबर : राज्य मार्ग परिवहन महामंडळाच्या (एसटी) बस प्रवासासाठी टप्प्याटप्प्याने अनिवार्य करण्यात येत असलेल्या नॅशनल कॉमन मोबिलिटी कार्ड (एनसीएमसी) स्मार्ट कार्डबाबत महत्त्वाच्या घडामोडी समोर आल्या आहेत. सवलतधारक प्रवाशांना देण्यात येणाऱ्या या कार्डच्या रिचार्ज प्रक्रियेत होणारी तफावत आणि सर्व्हर डाऊनमुळे प्रवाशांची होणारी गैरसोय लक्षात घेऊन महामंडळाने विशेष निर्देश जारी केले आहेत.
रिचार्ज शुल्कातील तफावतीवर स्पष्टीकरण
एनसीएमसी स्मार्ट कार्ड रिचार्ज करताना एजंट आणि एसटी वाहकांकडून आकारल्या जाणाऱ्या शुल्कात फरक दिसून येत आहे. एजंटमार्फत रिचार्ज केल्यास मर्चंट डिस्काउंट रेटमुळे (एमडीआर) काही प्रमाणात रक्कम कमी जमा होत असल्याच्या तक्रारी प्राप्त झाल्या होत्या. यावर तोडगा म्हणून प्रवाशांना थेट एसटी वाहकांकडून अथवा आगारातील काउंटरवरून रिचार्ज करण्याचा सल्ला देण्यात आला असून, ऑनलाईन पद्धतीने घरबसल्याही रिचार्ज करण्याची सोय उपलब्ध करून देण्यात आली आहे.
प्रवाशांची गैरसोय टाळण्यासाठी विशेष सवलत
एनसीएमसी कार्ड अनिवार्य करण्याच्या प्रक्रियेदरम्यान तांत्रिक बिघाड किंवा सर्व्हर डाऊन झाल्यास प्रवाशांना कोणताही त्रास होऊ नये, यासाठी मॅन्युअल तिकीट देण्याच्या सूचना देण्यात आल्या आहेत. नोंदणी पावती दाखवून प्रवाशांना सवलतीचा प्रवास करता येणार आहे. तसेच अतिरिक्त शुल्क आकारणाऱ्या परवानाधारक एजंट्सवर कडक कारवाईचा इशारा परिवहन मंत्री प्रताप सरनाईक यांनी दिला आहे.
