मुंबईसह सातारा व पुण्यात मुसळधार पावसाचा इशारा
राज्याच्या आपत्ती व्यवस्थापन विभागाने ४ ते ६ जुलै दरम्यान मुंबई, कोकण आणि मध्य महाराष्ट्रातील सातारा, पुणे घाट परिसरात मुसळधार पावसाचा इशारा दिला आहे.
स्थैर्य, मुंबई, दि. ३ जुलै : मुंबई शहरासह कोकण आणि मध्य महाराष्ट्रातील घाट परिसरात ४ ते ६ जुलै दरम्यान मुसळधार ते अतिमुसळधार पावसाचा अंदाज वर्तवण्यात आला आहे. या पार्श्वभूमीवर राज्याच्या आपत्ती व्यवस्थापन विभागाने नागरिकांना सतर्कतेचा इशारा दिला असून सखल भाग आणि घाट रस्त्यांवर प्रवासात विशेष काळजी घेण्याचे आवाहन केले आहे.
‘या’ जिल्ह्यांना पावसाचा तडाखा
रायगड, ठाणे, पालघर, रत्नागिरी आणि सिंधुदुर्ग या कोकणातील जिल्ह्यांसह मुंबईत पावसाचा जोर वाढण्याची शक्यता आहे. यासोबतच मध्य महाराष्ट्रातील सातारा, पुणे आणि नाशिक जिल्ह्यांच्या घाट परिसरामध्येही ४ ते ६ जुलै या कालावधीत अत्यंत मुसळधार पाऊस पडेल, असा अंदाज हवामान खात्याने वर्तवला आहे.
प्रवासात अडथळे आणि नुकसानीची शक्यता
सलग कोसळणाऱ्या पावसामुळे स्थानिक वाहतूक आणि प्रवासात मोठे अडथळे निर्माण होण्याची दाट शक्यता आहे. तसेच काही ठिकाणी संरचनात्मक नुकसानही होऊ शकते. त्यामुळे सखल भागात राहणाऱ्या नागरिकांनी आणि घाट रस्त्यांवरून प्रवास करणाऱ्यांनी आवश्यक ती काळजी घ्यावी.
आपत्ती व्यवस्थापनाचे आवाहन
पावसाचा वाढता जोर आणि संभाव्य धोके पाहता नागरिकांनी सतर्क राहावे. कोणत्याही आपत्कालीन परिस्थितीत तातडीने स्थानिक प्रशासनाच्या आपत्कालीन मदत क्रमांकांवर संपर्क साधावा, असे स्पष्ट निर्देश राज्य आपत्ती व्यवस्थापन विभागाकडून देण्यात आले आहेत.
