विद्यार्थ्यांनीच सांभाळली शिक्षकाची भूमिका; मुधोजी महाविद्यालयात अनोखा प्रयोग

मुधोजी महाविद्यालयात बी.कॉम.च्या विद्यार्थ्यांनी शिक्षकाची भूमिका साकारत वर्ग घेतले. अभिनव उपक्रमातून नेतृत्व अन् व्यवस्थापनाचा धडा मिळाला.

स्थैर्य, फलटण, दि. ०६ सप्टेंबर : मुधोजी महाविद्यालयाच्या वाणिज्य विद्याशाखेत शिक्षक दिनाचे औचित्य साधून ‘Students-Driven Programme’ या संकल्पनेअंतर्गत अभिनव उपक्रम राबवण्यात आला. यामध्ये बी.कॉम. भाग तीनच्या वरिष्ठ विद्यार्थ्यांनी प्रत्यक्ष शिक्षकाची भूमिका स्वीकारत कनिष्ठ विद्यार्थ्यांचे वर्ग घेतले. कार्यक्रमाचे संपूर्ण नियोजन, सूत्रसंचालन आणि अंमलबजावणी विद्यार्थ्यांनीच करत या उपक्रमात उत्स्फूर्त सहभाग नोंदवला.

विद्यार्थ्यांनी घेतला अध्यापनाचा प्रत्यक्ष अनुभव

वरिष्ठ विद्यार्थ्यांनी विषयाचे नियोजन, अध्यापन, विद्यार्थ्यांशी संवाद आणि वर्ग व्यवस्थापनाची जबाबदारी यशस्वीपणे सांभाळली. यामुळे विद्यार्थ्यांना नेतृत्व, आत्मविश्वास, संवादकौशल्य आणि नियोजनक्षमता यांचा प्रत्यक्ष अनुभव घेता आला. विद्यार्थ्यांनी शिक्षकाची भूमिका साकारताना आलेले अनुभव आणि आव्हाने मनोगतातून मांडली.

प्राचार्यांची संकल्पना आणि मार्गदर्शन

महाविद्यालयाचे प्राचार्य डॉ. पी. एच. कदम यांच्या संकल्पनेतून हा उपक्रम राबवण्यात आला. शिक्षण ही केवळ वर्गात शिकवण्याची प्रक्रिया नसून जबाबदारी आणि नेतृत्व घडवणारी प्रक्रिया असल्याचे मत डॉ. कदम यांनी व्यक्त केले. यावेळी वाणिज्य शाखाप्रमुख प्रा. जे. पी. बोराटे, विभागप्रमुख प्रा. लक्ष्मीकांत वेळेकर आणि IQAC समन्वयक डॉ. टी. पी. शिंदे उपस्थित होते.