एसटीच्या एनसीएमसी कार्डाबाबत मोठा निर्णय; प्रवाशांसाठी ३० दिवसांची विशेष सोय
थेट WhatsApp वर मिळवा
एसटी महामंडळाच्या सवलतीच्या प्रवासासाठी आवश्यक असलेल्या एनसीएमसी स्मार्ट कार्डच्या वितरणात होणारा विलंब लक्षात घेता, प्रवाशांना मोठा दिलासा देत महामंडळाने क्यूआर कोड आधारित पावती ३० दिवस ग्राह्य धरण्याचा निर्णय घेतला आहे.
स्थैर्य, सातारा, दि. २२ ऑक्टोबर : राज्य सरकारच्या योजनेनुसार महिला आणि ज्येष्ठ नागरिकांना एसटी बस प्रवासात मिळणाऱ्या सवलतींचा लाभ घेण्यासाठी ‘नॅशनल कॉमन मोबिलिटी कार्ड’ (NCMC) अनिवार्य करण्यात आले आहे. मात्र, कार्ड काढण्यासाठी अर्ज केल्यानंतर प्रत्यक्ष स्मार्ट कार्ड हाती मिळेपर्यंत कालावधी जात असल्याने प्रवाशांची गैरसोय होत होती. ही अडचण दूर करण्यासाठी एसटी महामंडळाने अत्यंत महत्त्वपूर्ण पाऊल उचलले असून, कार्ड मिळेपर्यंत क्यूआर कोड असलेली पावती ३० दिवसांसाठी ग्राह्य धरण्यात येणार असल्याचे स्पष्ट केले आहे.
प्रवाशांची गैरसोय टाळण्यासाठी पर्यायी व्यवस्था
नवीन नियमांनुसार, पात्र प्रवाशांनी एनसीएमसी कार्डसाठी नोंदणी केल्यानंतर त्यांना एक क्यूआर कोड असलेली पावती दिली जाते. एसटीच्या ई-तिकीट यंत्रावर हा क्यूआर कोड स्कॅन करून प्रवाशांना नियमानुसार सवलतीचे तिकीट मिळवणे शक्य होणार आहे. ही पावती नोंदणी केल्याच्या तारखेपासून केवळ ३० दिवसच वैध असणार आहे. या मुदतीत लाभार्थ्यांनी प्रत्यक्ष स्मार्ट कार्ड प्राप्त करून ते सक्रिय करणे आणि आवश्यक रक्कम जमा करणे बंधनकारक आहे.
भीम ॲपद्वारे रिचार्जची सुविधा उपलब्ध
पुणे विभागात लाखो नागरिकांनी या कार्डसाठी नोंदणी केली असून मोठ्या प्रमाणावर वाटपही झाले आहे. प्रवाशांना कार्ड रिचार्ज करण्यासाठी वारंवार केंद्रांवर फेऱ्या माराव्या लागू नयेत, यासाठी ‘भीम’ ॲपच्या माध्यमातून घरबसल्या कार्ड टॉप-अप किंवा रिचार्ज करण्याची सोय उपलब्ध करून देण्यात आली आहे. त्यामुळे सवलतीच्या प्रवासासाठी पात्र असलेल्या नागरिकांनी वेळेत नोंदणी करून या सेवेचा लाभ घ्यावा, असे आवाहन प्रशासनाकडून करण्यात येत आहे.
