फलटण: मंगलादेवी नाईक निंबाळकर यांच्या वाढदिवसानिमित्त भव्य आरोग्य शिबिर व सामाजिक उपक्रम
नगरसेविका मंगलादेवी नाईक निंबाळकर यांच्या वाढदिवसानिमित्त फलटणमध्ये मोफत आरोग्य शिबिर, दंतचिकित्सा आणि महिलांसाठी एसटी सवलत कार्ड वाटप कार्यक्रमाचे यशस्वी आयोजन करण्यात आले.
स्थैर्य, फलटण, दि. ०५ जुलै : फलटण नगरपरिषदेच्या नगरसेविका मंगलादेवी पृथ्वीराज नाईक निंबाळकर यांच्या वाढदिवसानिमित्त मलठण येथील श्री स्वामी समर्थ मंदिरात विविध सामाजिक उपक्रमांचे यशस्वी आयोजन करण्यात आले. याअंतर्गत मोफत आरोग्य व दंतचिकित्सा शिबिर, मोतीबिंदू तपासणी, वृक्षारोपण आणि महिलांसाठी सवलतीच्या दरात एसटीचे स्मार्ट कार्ड काढण्याची सुविधा उपलब्ध करून देण्यात आली.
मान्यवरांची प्रमुख उपस्थिती
या सामाजिक उपक्रमांचे उद्घाटन आमदार सचिन पाटील आणि सातारा जिल्हा परिषदेच्या माजी सदस्या जिजामाला रणजितसिंह नाईक निंबाळकर यांच्या हस्ते करण्यात आले. फलटणचे नगराध्यक्ष समशेरसिंह नाईक निंबाळकर, उपनगराध्यक्षा प्रियदर्शनी भोसले, स्वराज्य नागरी सहकारी पतसंस्थेचे चेअरमन अमरसिंह नाईक निंबाळकर आणि नगरपालिकेचे मुख्याधिकारी निखिल जाधव यांची प्रमुख उपस्थिती होती. या संपूर्ण कार्यक्रमाचे नेटके आयोजन नगरसेवक किरण देवदास राऊत यांनी केले.
आरोग्य शिबिराला उत्स्फूर्त प्रतिसाद
निकोप हॉस्पिटल, मुख्यमंत्री सहायता निधी आणि प्रधानमंत्री जनआरोग्य योजनेच्या माध्यमातून भव्य मोफत आरोग्य शिबिराचे आयोजन करण्यात आले होते. यामध्ये हृदयरोगतज्ज्ञ डॉ. जे. टी. पोळ यांनी रुग्णांची तपासणी करून मार्गदर्शन केले. तसेच डॉ. विश्वराज निकम यांच्या मार्गदर्शनाखाली मोफत दंतचिकित्सा शिबिर पार पडले. लायन्स मुधोजी चॅरिटेबल आय हॉस्पिटलच्या वतीने मोफत मोतीबिंदू तपासणी व अल्पदरात शस्त्रक्रिया करण्याची सुविधा नागरिकांना उपलब्ध करून देण्यात आली.
महिलांसाठी एसटी स्मार्ट कार्ड सुविधा
शासनाच्या एसटी बस प्रवासातील ५० टक्के सवलत योजनेचा लाभ मिळवण्यासाठी आवश्यक असणारे NCMC स्मार्ट कार्ड सवलतीच्या दरात (२३० रुपये) महिलांना या शिबिरात काढून देण्यात आले. सर्व वयोगटातील महिला आणि विद्यार्थिनींनी या सुविधेचा मोठ्या प्रमाणावर लाभ घेतला. यासोबतच वाढदिवसाचे औचित्य साधून परिसरात वृक्षारोपणाचा कार्यक्रमही यशस्वीपणे पार पडला.
