शिवजयंतीनिमित्त फलटण शहरात प्रशासनाचे मोठे बदल: आज वाहतुकीत बदल, तर रविवारचा आठवडे बाजारही नव्या ठिकाणी भरणार

छत्रपती शिवाजी महाराज जयंतीनिमित्त फलटण शहरात प्रशासनाने महत्त्वाचे बदल केले आहेत. आज (१७ एप्रिल) ‘श्वासात राजे ध्यासात राजे’ कार्यक्रमासाठी वाहतूक वळवली असून, रविवारी (१९ एप्रिल) भरणारा आठवडे बाजार गिरवी नाका परिसरात हलवण्यात आला आहे.

स्थैर्य, फलटण, दि. 17 एप्रिल : आगामी छत्रपती शिवाजी महाराज जयंती उत्सवाच्या पार्श्वभूमीवर फलटण शहरात प्रशासनाने जय्यत तयारी सुरू केली आहे. शिवजयंतीनिमित्त आयोजित विविध सांस्कृतिक कार्यक्रम आणि निघणाऱ्या भव्य मिरवणुकीच्या अनुषंगाने शहरात वाहतूक कोंडी होऊ नये आणि नागरिकांची गैरसोय टळावी, यासाठी पोलीस, महसूल व नगरपरिषद प्रशासनाने दोन महत्त्वाचे निर्णय घेतले आहेत. यामध्ये आज (दि. १७) शहरातील वाहतूक मार्गात बदल करण्यात आले असून, येत्या रविवारी (दि. १९) भरणारा आठवडे बाजारही दुसऱ्या ठिकाणी स्थलांतरित करण्यात आला आहे.

१. आज ‘श्वासात राजे ध्यासात राजे’ कार्यक्रमासाठी वाहतुकीत बदल:

छत्रपती शिवाजी महाराज जयंतीनिमित्त आज, शुक्रवार दि. १७ एप्रिल रोजी सायंकाळी ४:०० वाजल्यापासून छत्रपती शिवाजी महाराज चौक येथे ‘श्वासात राजे ध्यासात राजे’ हा भव्य सांस्कृतिक कार्यक्रम आयोजित करण्यात आला आहे. या कार्यक्रमास मोठी गर्दी होण्याची शक्यता असल्याने फलटण उपविभागाच्या उपविभागीय दंडाधिकारी (SDM) प्रियांका आंबेकर-ठोकळ यांनी भारतीय नागरिक सुरक्षा संहिता कलम १६३ (१) अन्वये वाहतूक मार्गात बदल करण्याचे आदेश दिले आहेत.

वाहतुकीतील मुख्य बदल (आज सकाळी १० ते रात्री ११ वाजेपर्यंत):

• मार्ग बंद व नो पार्किंग झोन: क्रांतीसिंह नाना पाटील चौक व छ. शिवाजी महाराज चौक ते बारामती चौक व मंगळवार पेठ/मलठण बाजकडे जाणारी वाहतूक पूर्णपणे बंद राहील.

  

• पर्यायी मार्ग: या मार्गावरील वाहतूक क्रांतीसिंह नाना पाटील चौक येथून रिंगरोड मार्गे मंगळवार पेठ, मलठणकडे व मलठण बाजूकडून क्रांती नाना पाटील चौकाकडे वळवण्यात आली आहे.

  

• मार्ग बंद व नो पार्किंग झोन: डॉ. बाबासाहेब आंबेडकर चौक ते छ. शिवाजी महाराज चौकाकडे जाणारी वाहतूक पूर्णपणे बंद राहील.

  

• पर्यायी मार्ग: ही वाहतूक डॉ. बाबासाहेब आंबेडकर चौक मंडई येथून रविवार पेठ व शिवशक्ती चौक मार्गे पुढे जाईल.

२. रविवारचा (दि. १९ एप्रिल) ‘आठवडे बाजार’ नव्या ठिकाणी:

रविवार, दि. १९ एप्रिल रोजी शिवजयंतीचा मुख्य उत्सव असल्याने फलटण शहरात मोठी मिरवणूक निघणार आहे. ही मिरवणूक छत्रपती शिवाजी महाराज चौक ते डॉ. बाबासाहेब आंबेडकर चौक ते महात्मा फुले चौक ते मालोजीराजे पुतळा या मुख्य मार्गावरून जाते.

या दिवशी नेमका रविवारचा आठवडे बाजार असल्याने या परिसरात मोठी गर्दी होण्याची शक्यता आहे. यामुळे वाहतूक कोंडी आणि नागरिकांची गैरसोय टाळण्यासाठी फलटण नगरपरिषदेने या रविवारचा (दि. १९ एप्रिल) आठवडे बाजार तात्पुरता हलवण्याचा निर्णय घेतला आहे.

येथे भरणार आठवडे बाजार:

या रविवारी फलटणचा आठवडे बाजार “गिरवी नाका ते शासकीय विश्रामगृह ते बी.एस.एन.एल. (BSNL) ऑफिस रोड, कामगार वसाहत” या ठिकाणी बसवण्यात येणार आहे.

प्रशासनाचे आवाहन:

शहरातील आणि पंचक्रोशीतील सर्व नागरिकांनी, तसेच व्यापाऱ्यांनी वाहतूक मार्गातील बदल आणि आठवडे बाजाराच्या जागेतील बदलाची नोंद घ्यावी. शिवजयंती उत्सव शांततेत आणि सुव्यवस्थेत पार पाडण्यासाठी सर्व नागरिकांनी प्रशासनाला व नगरपरिषदेला सहकार्य करावे, असे जाहीर आवाहन मुख्याधिकारी निखील जाधव आणि उपविभागीय दंडाधिकारी प्रियांका आंबेकर-ठोकळ यांनी केले आहे.