दुष्काळग्रस्तांच्या मदतीसाठी सरकारी कर्मचाऱ्यांचे वेतन; आक्षेप असल्यास द्यावे लागणार पत्र
थेट WhatsApp वर मिळवा
राज्यातील दुष्काळग्रस्त शेतकऱ्यांना आधार देण्यासाठी राज्य सरकारी कर्मचाऱ्यांचे ऑक्टोबर महिन्यातील एक दिवसाचे वेतन मुख्यमंत्री सहायता निधीमध्ये वर्ग करण्याचा निर्णय घेण्यात आला असून, कपातीबाबत आक्षेप असल्यास दोन दिवसांत अर्ज करावा लागणार आहे.
स्थैर्य, सातारा, दि. १७ ऑक्टोबर : राज्यातील अनेक भागांत निर्माण झालेल्या गंभीर दुष्काळी परिस्थितीचा सामना करणाऱ्या शेतकऱ्यांना मदत करण्यासाठी राज्य शासनाने मोठा निर्णय घेतला आहे. या निर्णयानुसार राज्यातील सर्व अधिकारी आणि कर्मचाऱ्यांचे ऑक्टोबर महिन्यातील एक दिवसाचे वेतन मुख्यमंत्री सहायता निधीमध्ये जमा केले जाणार आहे.
वेतन कपातीची प्रक्रिया आणि नियम
ऑक्टोबर महिन्याच्या वेतनातून एक दिवसाच्या वेतनाची कपात करताना मूळ वेतन आणि महागाई भत्ता यांच्या एकत्रित रकमेच्या आधारे गणना केली जाणार आहे. या मदतकार्यात सहभागी होण्यासंदर्भात शासन पातळीवर निर्देश देण्यात आले असून, जमा होणाऱ्या रकमेची कर्मचारीनिहाय नोंद ठेवण्यासाठी स्वतंत्र नोंदवही तयार केली जाणार आहे. संबंधित कार्यालयांनी जमा झालेली रक्कम निधीत भरून त्याची पोचपावती आणि देणगीदारांची यादी नियमानुसार सादर करण्याचे आदेश देण्यात आले आहेत.
कर्मचाऱ्यांसाठी महत्त्वाची अट
ज्या अधिकारी किंवा कर्मचाऱ्यांना त्यांच्या वेतनातून एक दिवसाचे वेतन कपात करण्यास हरकत असेल, त्यांना तशी मुभा देण्यात आली आहे. अशा कर्मचाऱ्यांना परिपत्रकासोबत दिलेल्या नमुन्यातील हरकतपत्र संबंधित कार्यालयाच्या नियंत्रक किंवा आस्थापना अधिकाऱ्यामार्फत आहरण व संवितरण अधिकाऱ्यांकडे दोन दिवसांत सादर करणे बंधनकारक करण्यात आले आहे.
