रस्ते विकासकामांमुळे जालना जिल्ह्याच्या विकासाला गती मिळेल; सार्वजनिक बांधकाम मंत्री शिवेंद्रराजे भोसले यांचा विश्वास
थेट WhatsApp वर मिळवा
जालन्यातील जाफ्राबाद येथे ८४ कोटी रुपये किमतीच्या रस्ते विकासकामांचे मंत्री शिवेंद्रराजे भोसले आणि माजी केंद्रीय मंत्री रावसाहेब दानवे यांच्या उपस्थितीत लोकार्पण व उद्घाटन पार पडले. यामुळे दळणवळण अधिक वेगवान होणार आहे.
स्थैर्य, जाफ्राबाद (जालना) : महायुती सरकारच्या माध्यमातून राज्याच्या विकासाला मोठी गती मिळाली आहे. राज्यातील सर्वच जिल्ह्यांमध्ये विविध प्रकारच्या विकासकामांसाठी भरीव निधी उपलब्ध करून दिला गेला आहे. जालना जिल्ह्यातील रस्ते विकासकामांसाठी राज्याच्या अर्थसंकल्पात मोठी तरतूद करण्यात आली असून, या दर्जेदार विकासकामांमुळे जालना जिल्ह्याच्या विकासाला नक्कीच गती मिळेल, असा सार्थ विश्वास राज्याचे सार्वजनिक बांधकाम मंत्री श्रीमंत छ. शिवेंद्रसिंहराजे भोसले यांनी व्यक्त केला.
८४ कोटींच्या रस्ते विकासकामांचे लोकार्पण
जालन्यातील जाफ्राबाद येथे अर्थसंकल्पीय तरतुदीअंतर्गत तब्बल ८४ कोटी रुपये किमतीच्या विविध रस्ते विकासकामांचा उद्घाटन व लोकार्पण सोहळा ना. शिवेंद्रसिंहराजे भोसले यांच्या हस्ते आणि माजी केंद्रीय मंत्री रावसाहेब पाटील दानवे यांच्या प्रमुख उपस्थितीत मोठ्या उत्साहात संपन्न झाला.
या प्रमुख रस्त्यांचा होणार विकास :
या निधीमधून प्रामुख्याने खालील महत्त्वाच्या रस्त्यांची सुधारणा केली जाणार आहे:
जाफ्राबाद-चिखली रस्त्याची सुधारणा करणे.
जाफ्राबाद-टाकळी-गारखेडा-बोरखेडी गायके रस्त्याची सुधारणा करणे.
या नव्या आणि सुधारित रस्त्यांमुळे भोकरदन-जाफ्राबाद मतदारसंघातील दळणवळण अधिक वेगवान आणि सुखकर होणार आहे. रस्ते चांगले झाल्याने परिसरातील शेतकऱ्यांच्या शेतमालाला वेळेत बाजारपेठ मिळणे अधिक सोपे होणार असून, याचा थेट फायदा ग्रामीण अर्थव्यवस्थेला होणार आहे.
मान्यवरांची उपस्थिती
या दिमाखदार सोहळ्याला माजी मंत्री तथा आमदार बबनराव लोणीकर, आमदार संतोष रावसाहेब दानवे, आमदार नारायण कुचे, माजी आमदार विलास बापू खरात, भाजपा जालना शहराध्यक्ष भास्कर दानवे, जालना महानगरपालिकेच्या महापौर वंदनाताई मगरे, उपमहापौर राजेश राऊत, नगराध्यक्ष दीपक वाकडे यांच्यासह स्थानिक लोकप्रतिनिधी उपस्थित होते.
तसेच, सार्वजनिक बांधकाम प्रादेशिक विभाग छत्रपती संभाजीनगरचे मुख्य अभियंता अतुल चव्हाण, अधीक्षक अभियंता मगर, कार्यकारी अभियंता स्मिता पवार यांच्यासह भाजपाचे पदाधिकारी, कार्यकर्ते आणि परिसरातील नागरिक मोठ्या संख्येने उपस्थित होते.
