हातगेघर उपसा सिंचन योजनेला तत्त्वतः मान्यता; लिंब येथील कातकरी वस्तीच्या रस्त्याचा मार्ग मोकळा: मंत्री शिवेंद्रसिंहराजे

स्थैर्य, सातारा, दि. २ जुलै : सार्वजनिक बांधकाम मंत्री शिवेंद्रसिंहराजे भोसले आणि जलसंपदा मंत्री राधाकृष्ण विखे पाटील यांच्या उपस्थितीत मंत्रालयात नुकत्याच झालेल्या एका महत्त्वपूर्ण बैठकीत सातारा जिल्ह्यातील दोन महत्त्वाच्या विकासकामांच्या प्रस्तावांवर सकारात्मक निर्णय घेण्यात आला आहे. यात जावळी तालुक्यातील हातगेघरसाठी उपसा सिंचन योजना आणि सातारा तालुक्यातील लिंब येथील कातकरी वस्तीला जोडणाऱ्या रस्त्याला मान्यता देण्यात आली आहे.

बैठकीतील प्रमुख निर्णय आणि घडामोडी:

• हातगेघर उपसा सिंचन योजना (तालुका जावळी): हातगेघर गावातील सुमारे २२७ हेक्टर शेतजमीन अद्याप सिंचनापासून वंचित आहे. कुडाळी प्रकल्पातील बंदिस्त नलिका प्रणालीमुळे (Closed Pipeline System) वाचणाऱ्या पाण्याचा उपयोग करून या अतिरिक्त क्षेत्राला सिंचनाचा लाभ देणे शक्य असल्याचे तांत्रिकदृष्ट्या स्पष्ट झाले आहे. त्यामुळे या प्रस्तावित उपसा सिंचन योजनेला तत्त्वतः मान्यता देण्यात आली असून, पुढील सर्वेक्षण व अंदाजपत्रक तयार करण्याची प्रक्रिया गतीने राबवली जाणार आहे.

• लिंब कातकरी वस्तीचा रस्ता (तालुका सातारा): लिंब येथील कातकरी वस्तीला जोडणारा रस्ता (पद्मावती मंदिर ते कातकरी वस्ती) ‘प्रधानमंत्री जनजाती आदिवासी न्याय महाअभियान’ (PM JANMAN) योजनेअंतर्गत मंजूर आहे. तांत्रिक पाहणीनंतर धोम उजव्या कालव्यालगत या रस्त्याच्या बांधकामासाठी जागा उपलब्ध असल्याचे स्पष्ट झाल्याने, त्याला आवश्यक परवानगी देण्यात आली आहे. या निर्णयामुळे आदिवासी कातकरी समाजाला कायमस्वरूपी आणि सुरक्षित रस्त्याची सुविधा उपलब्ध होण्याचा मार्ग मोकळा झाला आहे.

  

अधिकाऱ्यांना सक्त सूचना:

सार्वजनिक बांधकाम मंत्री शिवेंद्रसिंहराजे भोसले यांनी सातारा जिल्ह्यातील या प्रलंबित विकासकामांना, आदिवासी वस्तींसाठीच्या मूलभूत सुविधांना आणि शेतकऱ्यांच्या सिंचनाच्या प्रश्नांना प्राधान्य देत, संबंधित विभागांनी पुढील आवश्यक कार्यवाही तातडीने पूर्ण करण्याच्या सूचना अधिकाऱ्यांना दिल्या आहेत.