दसऱ्याच्या मुहूर्तावर सोन्या-चांदीच्या दरात मोठी वाढ; ग्राहकांना आर्थिक फटका
थेट WhatsApp वर मिळवा
दसऱ्याच्या मुहूर्तावर सोने आणि चांदी खरेदी करू इच्छिणाऱ्या ग्राहकांना मोठा आर्थिक फटका बसला असून, ऐन सणासुदीच्या काळात मौल्यवान धातूंच्या किमतीत मोठी वाढ झाली आहे.
स्थैर्य, सातारा, दि. २० ऑक्टोबर : दसऱ्याच्या पार्श्वभूमीवर सोने-चांदी खरेदी करण्याचा विचार करणाऱ्या ग्राहकांसाठी महत्त्वाची बातमी आहे. १९ ऑक्टोबर २०२६ रोजी सोन्याच्या दरात पुन्हा वाढ झाल्याचे चित्र पाहायला मिळत आहे. घसरणीनंतर सोन्याच्या किमतीत झालेल्या या बदलामुळे सराफा बाजारातील दरांकडे ग्राहकांचे लक्ष लागले आहे. लोकसत्ताने दिलेल्या माहितीनुसार, देशात १० ग्रॅम २४ कॅरेट सोन्याचा दर १ लाख ४८ हजार ५९० रुपये, तर २२ कॅरेट सोन्याचा दर १ लाख ३६ हजार २०८ रुपये नोंदवण्यात आला आहे.
मुंबई आणि पुण्यातील सराफा बाजारभाव
शहरनिहाय दरांनुसार, मुंबई, पुणे आणि नागपूरमध्ये २२ कॅरेट सोन्याची किंमत प्रति १० ग्रॅम १ लाख ३५ हजार ९६० रुपये, तर २४ कॅरेट सोन्याची किंमत १ लाख ४८ हजार ३२० रुपये आहे. नाशिकमध्येही २२ कॅरेट सोन्याचा दर १ लाख ३५ हजार ९६० रुपये आणि २४ कॅरेट सोन्याचा दर १ लाख ४८ हजार ३२० रुपये नोंदवण्यात आला आहे. हे दर प्रति १० ग्रॅमसाठी आहेत.
चांदीच्या किमतीतही मोठी उडी
सोन्याबरोबरच चांदीच्या किमतीकडेही ग्राहकांचे लक्ष आहे. १९ ऑक्टोबरच्या उपलब्ध बाजारभावानुसार, चांदीचा दर प्रति किलोग्रॅम २ लाख १२ हजार ७२० रुपये, तर १० ग्रॅम चांदीचा दर २ हजार १२७ रुपये आहे. आंतरराष्ट्रीय बाजारातील घडामोडी, डॉलरच्या तुलनेतील रुपयाचे मूल्य आणि मागणी-पुरवठ्यातील बदल यांचा सोने-चांदीच्या किमतींवर परिणाम होतो. दरम्यान, वरील दर सूचक असून प्रत्यक्ष खरेदीच्या वेळी जीएसटी, घडणावळ आणि इतर लागू शुल्कांमुळे अंतिम किंमत बदलू शकते. त्यामुळे दागिने खरेदी करण्यापूर्वी स्थानिक सराफाकडून दरांची खात्री करावी
