IVF उपचारांचा खर्च आता आरोग्य विम्यातून होऊ शकतो कव्हर; तज्ज्ञांनी दिली महत्त्वाची माहिती
बजाज आलियान्झ जनरल इन्श्युरन्सचे भास्कर नेरुरकर यांनी सांगितले पॉलिसी निवडताना काय काळजी घ्यावी
थेट WhatsApp वर मिळवा
स्थैर्य, दि. २३ सप्टेंबर : वंध्यत्वाच्या आव्हानांवर मात करून पालक बनण्याचे स्वप्न पाहणाऱ्या जोडप्यांसाठी ‘इन विट्रो फर्टिलायझेशन’ (IVF) हे एक वरदान ठरले आहे. मात्र, या उपचारांचा खर्च मोठा असल्याने अनेकांना आर्थिक अडचणींचा सामना करावा लागतो. अशा परिस्थितीत योग्य आरोग्य विमा मोठा आधार देऊ शकतो, अशी माहिती बजाज आलियान्झ जनरल इन्श्युरन्सच्या आरोग्य प्रशासन टीमचे प्रमुख भास्कर नेरुरकर यांनी दिली आहे.
काही वर्षांपूर्वीपर्यंत आरोग्य विमा पॉलिसीमध्ये IVF उपचारांचा समावेश नव्हता, परंतु आता अनेक विमा कंपन्या IVF उपचारांसाठी विविध योजना किंवा ॲड-ऑन्स देत आहेत. त्यामुळे जोडप्यांना आर्थिक दिलासा मिळण्यास मदत होत आहे.
आरोग्य विम्यात IVF कव्हरेजचे प्रकार
भास्कर नेरुरकर यांच्या मते, IVF कव्हरेजसाठी प्रामुख्याने तीन प्रकारचे पर्याय उपलब्ध आहेत.
१. ॲड-ऑन कव्हर: तुमच्या सध्याच्या आरोग्य विमा पॉलिसीला जोडून हा लाभ घेता येतो, जो उपचारांच्या खर्चाचा काही भाग कव्हर करतो.
२. स्टँडअलोन IVF पॉलिसी: ही पॉलिसी विशेषतः IVF उपचारांसाठीच तयार केलेली असते आणि अधिक व्यापक कव्हरेज देते. यामध्ये एकापेक्षा जास्त सायकल्स, औषधे आणि रुग्णालयाचा खर्च समाविष्ट असू शकतो.
३. इन-बिल्ट कव्हरेज: काही नवीन आरोग्य विमा योजनांमध्येच IVF मुळे उद्भवणाऱ्या गुंतागुंतीसाठी रुग्णालयात दाखल झाल्यास मॅटर्निटी पॅकेजच्या मर्यादेत खर्च कव्हर केला जातो.
पॉलिसी निवडताना काय तपासावे?
IVF साठी आरोग्य विमा निवडताना काही गोष्टी तपासणे अत्यंत महत्त्वाचे आहे. पॉलिसीमध्ये नेमके काय समाविष्ट आहे (उदा. निदान चाचण्या, औषधे, लॅब शुल्क), विम्याची एकूण मर्यादा किती आहे, उपचारांच्या किती सायकल्स कव्हर केल्या जातील आणि विम्याचा लाभ घेण्यासाठी प्रतीक्षा कालावधी (सामान्यतः २ ते ४ वर्षे) किती आहे, हे तपासून घ्यावे. तसेच, तुमच्या पसंतीचे प्रजनन क्लिनिक विमा कंपनीच्या नेटवर्कमध्ये आहे का, हे पाहणे महत्त्वाचे आहे, जेणेकरून दावा प्रक्रिया सुलभ होते.
योग्य आरोग्य विमा योजनेची निवड केल्यास IVF उपचारांचा आर्थिक भार मोठ्या प्रमाणात कमी होऊन पालकत्वाचा प्रवास सुकर होऊ शकतो, असेही नेरुरकर यांनी नमूद केले.
