दुधेबावी: ‘आई-वडिलांची सेवा केल्यास बाळूमामा नक्की भेटतील’; ह. भ. प. नवनाथ महाराज कोलवडकर यांचे प्रतिपादन
थेट WhatsApp वर मिळवा
दुधेबावी (ता. फलटण) येथे श्री संत बाळूमामा अमावस्या भंडारा उत्सवानिमित्त आयोजित कीर्तनात ह. भ. प. नवनाथ महाराज कोलवडकर यांनी आई-वडिलांच्या सेवेचे आणि सत्कर्माचे महत्त्व विशद केले.
स्थैर्य, फलटण, दि. १९ मे : सध्याच्या धावपळीच्या काळात मुलांना आई-वडिलांसाठी वेळ नसतो. अनेकजण देवदर्शनासाठी परदेशात जातात किंवा बाळूमामांच्या दर्शनासाठी आदमापूरला जातात. परंतु, खऱ्या अर्थाने जर आई-वडिलांची सेवा केली, तर बाळूमामा भेटल्याशिवाय राहणार नाहीत, असे मार्मिक प्रतिपादन ह. भ. प. नवनाथ महाराज कोलवडकर यांनी केले.
दुधेबावी (ता. फलटण) येथे श्री संत बाळूमामा अमावस्या भंडारा उत्सवानिमित्त आयोजित करण्यात आलेल्या कीर्तन सेवेत ह. भ. प. नवनाथ महाराज कोलवडकर बोलत होते. यावेळी त्यांनी उपस्थित भाविकांना सेवा आणि सत्कर्माचे महत्त्व समजावून सांगितले.
‘आभार मानण्यासाठी दरबारात जा’:
मार्गदर्शन करताना महाराज पुढे म्हणाले की, “श्री संत बाळूमामा हे जगाच्या पाठीवरील असे संत आहेत की, तुमची जर मेंढी माऊलीवर खरी श्रद्धा आणि सेवा असेल, तर ते कोणत्याही रूपात तुम्हाला भेटल्याशिवाय राहणार नाहीत. मात्र, तुमचे जर कर्म चांगले नसेल, तर जगाचा बाप जरी आला तरी तो तुम्हाला वाचवू शकत नाही. बाळूमामांच्या दरबारात नेहमी केवळ काहीतरी मागण्यासाठी जाऊ नका, तर त्यांनी तुम्हाला आतापर्यंत जे काही दिले आहे, त्याबद्दल त्यांचे आभार मानण्यासाठी जा.”
भक्तीमय वातावरणात बाळूमामांचा जयघोष:
श्री संत बाळूमामा हे जनसामान्यांचे लोकदैवत मानले जाते. त्यांनी समाजाला श्रद्धा, सेवा आणि मानवतेचा बहुमोल संदेश दिला आहे. ग्रामीण भागातील अनेक भक्त आजही त्यांच्या शिकवणीचे मनोभावे पालन करताना दिसून येतात. याच श्रद्धेतून दुधेबावी येथे नेहमी अशा यात्रा आणि धार्मिक कार्यक्रमांचे आयोजन केले जाते.
या कीर्तनादरम्यान उपस्थित भाविकांनी केलेल्या “बाळूमामाच्या नावानं चांगभलं” च्या जयघोषाने संपूर्ण परिसर दुमदुमून गेला होता. उत्सवादरम्यान संयोजकांच्या वतीने भाविकांसाठी चोख सुरक्षा आणि आवश्यक सुविधा उपलब्ध करून देण्यात आल्या होत्या. या भक्तीमय सोहळ्याला परिसरातील महिला, युवक आणि ज्येष्ठ नागरिक मोठ्या संख्येने उपस्थित होते.
