दुष्काळग्रस्त विद्यार्थ्यांच्या परीक्षा शुल्कात सवलत; जाचक अटी रद्द करण्याची मागणी तीव्र
थेट WhatsApp वर मिळवा
राज्य सरकारने दुष्काळग्रस्त भागातील विद्यार्थ्यांसाठी परीक्षा शुल्क माफी जाहीर केली असली, तरी शासन निर्णयातील जाचक अटींमुळे अनेक विद्यार्थी या लाभापासून वंचित राहण्याची शक्यता निर्माण झाली आहे. त्यामुळे या जाचक अटी तत्काळ रद्द करून विद्यार्थ्यांना सरसकट परीक्षा शुल्क माफी देण्यात यावी, अशी मागणी विद्यार्थी संघटनांनी केली आहे.
स्थैर्य, सातारा, दि. १२ नोव्हेंबर : राज्यातील दुष्काळग्रस्त तालुक्‍यांमधील विद्यार्थ्यांना दिलासा देण्यासाठी उच्च व तंत्र शिक्षण विभागाने परीक्षा शुल्क माफीची घोषणा केली आहे. मात्र, या निर्णयासोबत जोडण्यात आलेल्या काही अटींमुळे विद्यार्थ्यांमध्ये संताप व्यक्त होत आहे. शेतजमीन, शिष्यवृत्ती आणि रिपीटर विद्यार्थ्यांसंबंधीच्या निकषांमुळे अनेक गरजू विद्यार्थ्यांना या सवलतीचा लाभ मिळणार नसल्याचा आरोप विद्यार्थी संघटनांनी केला आहे. आधीच दुष्काळामुळे आर्थिक संकटात सापडलेल्या कुटुंबांमधील विद्यार्थ्यांना यामुळे मोठा फटका बसत आहे.
विद्यार्थ्यांसमोरील अडचणी आणि संघटनांचा पवित्रा
शासनाच्या याआधीच्या आदेशानुसार ज्या पालकांची शेतजमीन दुष्काळग्रस्त भागात आहे परंतु ते शहरात नोकरी किंवा व्यवसाय करतात, अशा विद्यार्थ्यांना या लाभातून वगळण्यात आले आहे. तसेच शिष्यवृत्ती मिळणाऱ्या विद्यार्थ्यांना किंवा अन्य योजनांचा लाभ घेणाऱ्यांना शुल्क माफी मिळताना विविध तांत्रिक अडचणी येत आहेत. शिष्यवृत्तीचे पैसे मिळण्यास अनेकदा उशीर होत असल्याने विद्यार्थ्यांनी परीक्षा शुल्क स्वतः कसे भरायचे, असा प्रश्न उपस्थित केला जात आहे. या पार्श्वभूमीवर विद्यार्थी संघटनांनी आक्रमक भूमिका घेत सर्व अटी शिथिल करून सरसकट शुल्क माफीची मागणी लावून धरली आहे.
