डॉ. वैशाली शिंदे यांचा सुवर्ण महोत्सवी वाढदिवस; शिक्षण क्षेत्रातील प्रवासाला उजाळा
थेट WhatsApp वर मिळवा
आयडियल इंटरनॅशनल स्कूल अँड ज्युनियर कॉलेजच्या संस्थापिका अध्यक्षा डॉ. वैशाली शिंदे यांच्या ५० व्या वाढदिवसानिमित्त शैक्षणिक व सामाजिक कार्याचा गौरव करण्यात आला.
स्थैर्य, फलटण, दि. 17 सप्टेंबर : आयडियल इंटरनॅशनल स्कूल अँड ज्युनियर कॉलेजच्या संस्थापिका अध्यक्षा डॉ. वैशाली शिंदे यांच्या ५० व्या सुवर्ण महोत्सवी वाढदिवसानिमित्त त्यांच्या शैक्षणिक आणि सामाजिक क्षेत्रातील कार्याला उजाळा देण्यात आला. फलटण परिसरात शिक्षणाच्या सुविधा वाढविण्यासह महिला सक्षमीकरण आणि सांस्कृतिक मूल्यांच्या जपणुकीसाठी त्यांनी विविध उपक्रम राबवले आहेत.
२००६ मध्ये सुरू झाला शैक्षणिक प्रवास
लक्ष्मीनगर येथे २००६ मध्ये सुरू झालेल्या शैक्षणिक संस्थेचा विस्तार पुढे बिरदेवनगर-जाधववाडीपर्यंत झाला. या दोन शाखांच्या माध्यमातून विद्यार्थ्यांना सीबीएसई आणि आंतरराष्ट्रीय पॅटर्नवर आधारित शिक्षण उपलब्ध करून देण्याचा प्रयत्न करण्यात आला. पुस्तकी शिक्षणासोबत संस्कार, तंत्रज्ञान, क्रीडा आणि राष्ट्रीय मूल्यांवर भर देण्यात आला आहे.
महिला सक्षमीकरणासाठी विविध उपक्रम
ग्रामीण भागातील मुलींना शिक्षणाची संधी मिळावी यासाठी पालकांचे समुपदेशन करण्यावर डॉ. शिंदे यांनी भर दिला. शाळेच्या माध्यमातून महिलांना शिक्षिका, समुपदेशक आणि प्रशासकीय कर्मचारी म्हणून रोजगाराच्या संधीही उपलब्ध करून देण्यात आल्या. मुलींच्या शिक्षणाबाबत जनजागृती करण्यासाठी विविध उपक्रम राबविण्यात आले.
मराठी संस्कृती आणि परंपरांची जपणूक
इंग्रजी माध्यमातून शिक्षण देतानाच विद्यार्थ्यांची मराठी संस्कृतीशी नाळ कायम राहावी, यासाठी शाळेत शिवजयंती, संत परंपरा, वारकरी विचार तसेच विविध सण-उत्सवांशी संबंधित उपक्रम आयोजित केले जातात. विद्यार्थ्यांच्या कलागुणांना व्यासपीठ मिळावे यासाठी सांस्कृतिक कार्यक्रमांनाही प्राधान्य दिले जाते.
‘भारत गौरव रतन पुरस्कार’ने सन्मान
शैक्षणिक आणि सामाजिक क्षेत्रातील कार्याबद्दल डॉ. वैशाली शिंदे यांना ‘भारत गौरव रतन पुरस्कार’ प्रदान करण्यात आला आहे. त्यांच्या ५० व्या वाढदिवसानिमित्त पुढील वाटचालीसाठी शुभेच्छा व्यक्त करण्यात आल्या आहेत.
