दात किडण्याच्या समस्येने त्रस्त आहात? रोजच्या ‘या’ चुका ठरतात दातांच्या नुकसानाला कारणीभूत
थेट WhatsApp वर मिळवा
दातांची निगा न राखल्यास आणि चुकीच्या सवयींमुळे दात किडणे, हिरड्यांमधून रक्त येणे व मुखाची दुर्गंधी यांसारख्या गंभीर समस्या उद्भवतात.
स्थैर्य,सातारा, दि. ११ ऑक्टोबर : लहान मुलांपासून ते वयोवृद्धांपर्यंत अनेक जण दातांचे आजार आणि कीड लागण्याच्या समस्येने त्रस्त असतात. चुकीच्या आहाराच्या सवयी, अयोग्य पद्धतीने ब्रश करणे आणि ओरल हायजीनकडे दुर्लक्ष केल्यामुळे दातांवरील ‘इनेमल’चा संरक्षक थर नष्ट होतो. परिणामी दात किडणे, संवेदनशील होणे आणि हिरड्या सुजणे यांसारखे त्रास सुरू होतात. आरोग्य तज्ज्ञांच्या मते, रोजच्या सवयींमध्ये थोडे बदल करून दातांचे आरोग्य उत्तम राखता येऊ शकते.
दातांच्या नुकसानाला कारणीभूत ठरणारे घटक
अति गोड, थंड किंवा आम्लयुक्त (एसिडिक) पदार्थांचे सतत सेवन केल्याने तोंडात बॅक्टेरियाची निर्मिती वेगाने होते. जेवणानंतर किंवा काहीही खाल्ल्यानंतर योग्य प्रकारे चुळ न भरणे, रात्री झोपण्यापूर्वी ब्रश न करणे यांमुळे अन्नाचे कण दातांच्या कोपऱ्यात अडकून राहतात. याशिवाय जोरात ब्रश घासल्याने दातांवरील इनेमल घसून दात कमजोर होतात. धुम्रपान आणि तंबाखूचे सेवन यामुळेही दातांचे सर्वाधिक नुकसान होते.
दातांच्या सुरक्षेसाठी सोपे आणि प्रभावी उपाय
दातांचे आरोग्य टिकवण्यासाठी दिवसातून दोनदा हलक्या हाताने किमान दोन मिनिटे ब्रश करणे आवश्यक आहे. दर सहा महिन्यांनी दंतवैद्यकांकडून दातांची तपासणी करून घेणे आणि ‘डेंटल फ्लॉस’चा वापर करून दातांमधील घाण स्वच्छ करणे गरजेचे आहे. आहारात कॅल्शियम आणि व्हिटॅमिन डी युक्त पदार्थांचा समावेश केल्यास दात आणि हिरड्या मजबूत राहतात.
