अंत्योदय योजनेतील साड्यांचा दर्जा निकृष्ट; लाभार्थी महिलांचा प्रशासनावर संताप
थेट WhatsApp वर मिळवा
राज्य शासनाच्या अंत्योदय अन्न योजनेअंतर्गत रेशन कार्डधारकांना मोफत वाटप करण्यात आलेल्या साड्या अत्यंत निकृष्ट दर्जाच्या असल्याच्या तक्रारी समोर आल्या आहेत. दर्जाहीन कापडामुळे संतप्त झालेल्या लाभार्थ्यांनी प्रशासनाविरोधात नाराजी व्यक्त करत या प्रकरणाची चौकशी करण्याची मागणी केली आहे.
स्थैर्य, सातारा, दि. ०७ ऑक्टोबर : राज्य सरकारच्या अंत्योदय योजनेअंतर्गत रेशन कार्डधारक कुटुंबांना मोफत वितरित करण्यात आलेल्या साड्यांच्या गुणवत्तेबाबत गंभीर प्रश्न निर्माण झाले आहेत. अनेक भागांत वितरित केलेल्या साड्यांचा दर्जा अत्यंत निकृष्ट, फाटलेला आणि वापरण्यास अयोग्य असल्याचा आरोप लाभार्थी महिलांनी केला आहे. शासनाच्या लोककल्याणकारी योजनेतून मिळणाऱ्या या वस्तूंच्या द दर्जाहीन पुरवठ्यामुळे नागरिक तीव्र संताप व्यक्त करत आहेत.
प्रशासकीय निष्काळजीपणावर महिलांची टीका
शासनाकडून मिळणाऱ्या सवलतींच्या वस्तू दर्जेदार असाव्यात अशी अपेक्षा असताना, प्रत्यक्षात हातात पडलेल्या साड्या निकृष्ट दर्जाच्या निघाल्याने लाभार्थ्यांमध्ये मोठी निराशा पसरली आहे. अनेक महिलांनी या साड्या वापरण्यायोग्य नसल्याचे सांगत प्रशासकीय नियोजनावर थेट प्रश्नचिन्ह उपस्थित केले आहे. कंत्राटदार आणि संबंधित पुरवठादार अधिकाऱ्यांच्या संगनमतामुळेच असा निकृष्ट दर्जाचा माल पुरवला गेल्याचा संशय व्यक्त होत आहे.
चौकशी आणि कारवाईची जोरदार मागणी
दरम्यान, या प्रकरणी वरिष्ठ अधिकाऱ्यांनी तातडीने लक्ष घालून दोषी पुरवठादारांवर कडक कारवाई करावी, अशी मागणी स्थानिक नागरिकांकडून होत आहे. गरिबांच्या योजनेत अशा प्रकारे निष्काळजीपणा करणाऱ्यांवर प्रशासनाने वचक बसवणे आवश्यक असल्याचे मत व्यक्त केले जात आहे. मोफत योजनेच्या नावाखाली निकृष्ट वस्तूंचे वाटप थांबवून लाभार्थ्यांना चांगल्या दर्जाचे साहित्य पुरवण्याची मागणी जोर धरत आहे.
