कोळकीत कृषीदेवता बलराम जयंती आणि भारत माता पूजन उत्साहात संपन्न
भारतीय किसान संघाच्या वतीने आयोजन; घोषणांनी दुमदुमला परिसर
थेट WhatsApp वर मिळवा
स्थैर्य, कोळकी, दि. ३१ ऑगस्ट : कोळकी, ता. फलटण येथील श्री हनुमान मंदिरात भारतीय किसान संघाच्या वतीने कृषीदेवता श्री भगवान बलराम जयंती आणि श्री भारत माता पूजन सोहळा मोठ्या उत्साहात आणि आनंदात साजरा करण्यात आला. या कार्यक्रमामुळे मंदिर परिसरात भक्तिमय आणि राष्ट्रभक्तीचे वातावरण निर्माण झाले होते.
कार्यक्रमाच्या सुरुवातीला भारतीय किसान संघाचे सातारा जिल्हा सहमंत्री ॲड. संजय कांबळे पाटील यांनी प्रास्ताविक केले. यावेळी त्यांनी श्री भगवान बलराम यांचे कृषीदेवता म्हणून असलेले महत्त्व आणि भारतीय किसान संघाच्या कार्याविषयी सविस्तर माहिती दिली. त्यानंतर, विश्व हिंदू परिषदेचे फलटण तालुकाध्यक्ष ॲड. शरद जगदाळे यांनी आपल्या मनोगतातून भारतीय किसान संघाच्या कार्याचे कौतुक केले.
यावेळी उपस्थित सर्व मान्यवरांनी श्री भगवान बलराम आणि भारत मातेच्या प्रतिमेला पुष्प अर्पण करून अभिवादन केले. ‘भारत माता की जय’, ‘श्री भगवान बलराम की जय’, ‘भारतीय किसान संघाचा विजय असो’ आणि ‘जय श्रीराम’ अशा घोषणांनी संपूर्ण परिसर दुमदुमून गेला.
या कार्यक्रमासाठी कोळकी ग्रामपंचायतीचे माजी सदस्य श्री. संजय देशमुख, ‘दैनिक सकाळ’चे पत्रकार श्री. विवेक लाटे, उद्योजक श्री. योगेश भानुशाली, उद्योजक श्री. निलेश गोसावी, श्री. सतीश दाणी, श्री. रमेश शिंदे, श्री. महादेव क्षिरसागर यांच्यासह कोळकी गावातील अनेक मान्यवर, ग्रामस्थ आणि बाल शाखेचे स्वयंसेवक उपस्थित होते. श्री. सतीश दाणी यांनी उपस्थितांचे आभार मानून कार्यक्रमाची सांगता केली.
