सातारा झेडपी ‘स्वीकृत सदस्य’ पदासाठी फलटणमध्ये चुरस; राजे गट विश्वजितराजे की दत्ता अनपट कुणाला देणार संधी?

सातारा जिल्हा परिषदेच्या स्वीकृत सदस्य निवडीसाठी फलटणच्या राजे गटाकडून जोरदार मोर्चेबांधणी सुरू. शिवसेनेच्या कोट्यातून श्रीमंत विश्वजितराजे नाईक निंबाळकर की दत्ता अनपट, कुणाच्या गळ्यात माळ पडणार, याकडे संपूर्ण तालुक्याचे लक्ष.

स्थैर्य, फलटण, दि. 7 मे : सातारा जिल्हा परिषदेच्या स्वीकृत सदस्यांची निवडणूक येत्या आठ ते दहा दिवसांत होण्याची दाट शक्यता आहे. फलटणच्या राजे गटाने शिवसेनेत प्रवेश केल्यानंतर शिवसेनेला जिल्ह्यात पहिल्यांदाच एवढे मोठे घवघवीत यश मिळाले आहे. त्यामुळे आता शिवसेनेच्या सातारा जिल्ह्याच्या कोट्यातून एक ‘स्वीकृत सदस्य’ (Nominated Member) हा फलटणचाच होणार, हे निश्चित मानले जात आहे. या एका जागेसाठी आता राजे गट नक्की कुणाला संधी देणार? याकडे संपूर्ण राजकीय वर्तुळाचे लक्ष लागून राहिले आहे.

या शर्यतीत प्रामुख्याने युवा नेते व फलटण पंचायत समितीचे माजी सभापती श्रीमंत विश्वजितराजे नाईक निंबाळकर आणि जिल्हा परिषदेचे माजी सदस्य धैर्यशील ऊर्फ दत्ता अनपट यांची नावे आघाडीवर असल्याची चर्चा राजकीय वर्तुळात रंगली आहे.

विश्वजितराजे की दत्ता अनपट? दावेदारी कोणाची प्रबळ?

सातारा जिल्हा परिषदेत फलटणच्या राजे गटासाठी शिवसेनेकडून एकच स्वीकृत जागा मिळणार आहे. या जागेसाठी दोघांचीही नावे चर्चेत येण्यामागे काही राजकीय समीकरणे आहेत:

• श्रीमंत विश्वजितराजे नाईक निंबाळकर: नुकत्याच संपन्न झालेल्या निवडणुकांमध्ये राजे कुटुंबातील एकाही व्यक्तीने थेट निवडणूक लढवली नाही. त्यामुळे कुटुंबातील प्रतिनिधी जिल्हा परिषदेत पाठवण्यासाठी श्रीमंत विश्वजितराजे यांचे नाव आघाडीवर असल्याचे बोलले जात आहे. कोळकी जिल्हा परिषद गटामधून विश्वजितराजे यांचे नाव सुरुवातीला चर्चेत होते; परंतु सह्याद्री कदम यांचा पक्षात आयत्यावेळी प्रवेश झाला, कोळकी गटाचे तिकीट त्यांना गेले आणि ते निवडूनही आले. यामुळे आता विश्वजितराजे यांना स्वीकृत सदस्य म्हणून संधी मिळू शकते.

  

• धैर्यशील ऊर्फ दत्ता अनपट: हिंगणगाव जिल्हा परिषद गटामधून दत्ता अनपट यांच्या पत्नी सौ. सारिका अनपट यांना शिवसेनेची अधिकृत उमेदवारी देण्यात आली होती, परंतु या निवडणुकीत त्यांचा पराभव झाला. त्यामुळे आता अनपट यांचे राजकीय पुनर्वसन करण्यासाठी त्यांना स्वीकृत सदस्य पदाची संधी दिली जाणार का, हा प्रश्न आहे.

नगरपरिषदेच्या इतिहासाची पुनरावृत्ती होणार?

फलटण नगरपरिषदेच्या स्वीकृत सदस्य निवडीवेळीही अनेक दिग्गज या पदाच्या रेसमध्ये होते; परंतु आयत्यावेळी धक्कातंत्र वापरत युवराज श्रीमंत अनिकेतराजे नाईक निंबाळकर यांच्या गळ्यात स्वीकृत सदस्यपदाची माळ पडली होती.

याच पार्श्वभूमीवर, आता जिल्हा परिषदेत पराभव झालेल्या उमेदवाराला संधी देऊन अनपट गटाला बळ दिले जाणार, की कुटुंबातील युवा नेते श्रीमंत विश्वजितराजे यांच्यावर जबाबदारी सोपवली जाणार, याची उत्सुकता शिगेला पोहोचली आहे.