सासकल परिसरात हुमणी अळीचा प्रादुर्भाव; वेळीच नियंत्रणाचे कृषी विभागाचे आवाहन
मोठ्या नुकसानीचा धोका, शेतकऱ्यांनी तातडीने उपाययोजना कराव्यात - सचिन जाधव
थेट WhatsApp वर मिळवा
स्थैर्य, सासकल, दि. १ सप्टेंबर : फलटण तालुक्यात मे महिन्यानंतर मोठ्या पावसाअभावी, सासकल आणि परिसरातील गावांमध्ये ऊस पिकावर हुमणी अळीचा प्रादुर्भाव दिसून येत आहे. या अळीमुळे पिकाचे मोठे नुकसान होऊन उत्पादनात घट येऊ शकते, त्यामुळे शेतकऱ्यांनी वेळीच एकात्मिक कीड नियंत्रणाचे उपाय योजावेत, असे आवाहन सासकलचे सहायक कृषी अधिकारी तथा कृषी सेवा रत्न श्री. सचिन जाधव यांनी केले आहे.
श्री. जाधव यांनी दिलेल्या माहितीनुसार, हुमणीची अळी जमिनीखाली राहून उसाची मुळे खाते, ज्यामुळे ऊस पिवळा पडून वाळायला लागतो. प्रादुर्भाव वाढल्यास १०० टक्केपर्यंत नुकसान होऊ शकते. तर, हुमणीचा प्रौढ भुंगा कडुलिंब आणि बाभळीची पाने खाऊन नुकसान करतो. त्यामुळे या किडीच्या जीवनक्रमानुसार वेळीच नियंत्रण करणे अत्यंत आवश्यक आहे.
कृषी विभागाने सुचवलेले एकात्मिक नियंत्रण उपाय:
- प्रौढ भुंगेऱ्यांचे नियंत्रण: संध्याकाळच्या वेळी बांधावरील कडुलिंब किंवा बाभळीच्या झाडांच्या फांद्या हलवून खाली पडलेले भुंगेरे गोळा करून रॉकेल मिश्रित पाण्यात टाकून नष्ट करावेत. प्रकाश सापळ्यांचा वापरही प्रभावी ठरतो. हे काम सामुदायिकरीत्या केल्यास अधिक फायदा होतो.
- जैविक पद्धतीचा वापर: रासायनिक कीटकनाशकांचे दुष्परिणाम टाळण्यासाठी जैविक नियंत्रणावर भर द्यावा.
- जैविक बुरशी: मेटारायझियम ॲनिसोपली (Metarhizium anisopliae) किंवा बव्हेरिया बॅसियाना (Beauveria bassiana) यांसारख्या जैविक बुरशींची शिफारशीनुसार पाण्यात मिसळून पिकाच्या बुंध्याजवळ आळवणी करावी.
- सूत्रकृमी (EPN): हुमणीच्या नैसर्गिक शत्रू असलेल्या सूत्रकृमींचा (एंटोमोपॅथोजेनिक निमॅटोड) वापर करणे हा एक अत्यंत प्रभावी आणि सुरक्षित उपाय आहे.
- अन्य उपाय: उन्हाळ्यात जमिनीची खोल नांगरट करावी, जेणेकरून किडीची अंडी आणि कोष उन्हामुळे नष्ट होतील. शेणखत वापरण्यापूर्वी ते हुमणीमुक्त असल्याची खात्री करावी.
शेतकऱ्यांनी आपल्या शेताचे नियमित निरीक्षण करून, प्रादुर्भाव दिसताच तातडीने नियंत्रणाचे उपाय सुरू करावेत, जेणेकरून संभाव्य मोठे नुकसान टाळता येईल, असे आवाहन श्री. सचिन जाधव यांनी केले आहे.
