गजानन चौक ते दगडी पूल रस्त्याचे रखडलेले काम अखेर मार्गी; नगरसेविका कु. सिद्धाली शहांच्या पाठपुराव्याला यश
थेट WhatsApp वर मिळवा
फलटण येथील गजानन चौक ते दगडी पूल रस्त्याचे रखडलेले काम पुन्हा सुरू झाले आहे. नगरसेविका सिद्धाली शहांच्या पाठपुराव्यामुळे नागरिकांना मोठा दिलासा मिळाला आहे.
स्थैर्य, फलटण, दि. २९ ऑक्टोबर : फलटण शहरातील प्रभाग क्रमांक ८ मधील गजानन चौक ते दगडी पूल या अत्यंत महत्त्वाच्या रस्त्याचे रखडलेले काम अखेर मार्गी लागले आहे. माजी खासदार रणजितसिंह नाईक-निंबाळकर यांचे आदेश, नगराध्यक्ष समशेरसिंह नाईक-निंबाळकर यांचे निर्देश आणि फलटण नगरपरिषदेच्या नगरसेविका कु. सिद्धाली अनुप शहा यांनी केलेल्या सातत्यपूर्ण पाठपुराव्यामुळे हे काम आता पुन्हा वेगाने सुरू झाले आहे.
जागतिक परिस्थितीमुळे निर्माण झाला होता अडथळा:
गजानन चौक ते दगडी पूल या रस्त्याच्या कामाला एप्रिल महिन्यात प्रशासकीय मंजुरी मिळाली होती. त्यानंतर ऑगस्ट महिन्यात या कामाचे मोठ्या उत्साहात भूमिपूजनही करण्यात आले होते. परंतु, जागतिक पातळीवर सुरू असलेल्या युद्धजन्य परिस्थितीमुळे डांबर आणि रस्त्यासाठी लागणाऱ्या इतर साहित्यांच्या दरात मोठी वाढ झाली होती. साहित्याची टंचाई आणि वाढलेल्या किमतींमुळे या रस्त्याचे कामकाज काही काळ ठप्प झाले होते.
पाठपुराव्याला यश आणि विकासाची ग्वाही:
रस्त्याचे काम थांबल्याने परिसरातील नागरिकांची गैरसोय होऊ नये, यासाठी नगरसेविका कु. सिद्धाली शहा यांनी प्रशासनाकडे आणि वरिष्ठ नेत्यांकडे सातत्याने पाठपुरावा केला. अखेर माजी खासदार रणजितसिंह नाईक-निंबाळकर यांनी दिलेल्या आदेशामुळे आणि नगराध्यक्ष समशेरसिंह नाईक-निंबाळकर यांच्या मार्गदर्शनाखाली या समस्येवर तोडगा काढण्यात आला आणि रस्त्याचे काम पुन्हा सुरू करण्यात आले.
यावेळी संवाद साधताना नगरसेविका कु. सिद्धाली अनुप शहा यांनी आपला संकल्प बोलून दाखवला. त्या म्हणाल्या की, “माजी खासदार रणजितसिंह नाईक-निंबाळकर, आमदार सचिन पाटील आणि नगराध्यक्ष समशेरसिंह नाईक-निंबाळकर यांच्या खंबीर नेतृत्वाखाली प्रभाग क्रमांक ८ चा सर्वांगीण विकास करण्यासाठी आम्ही पूर्णपणे कटिबद्ध आहोत.” रखडलेले काम पुन्हा सुरू झाल्यामुळे परिसरातील नागरिकांनी समाधान व्यक्त केले आहे.
