श्री क्षेत्र त्रिपुटीच्या श्रीनाथ संस्थानात ‘वैशाखी उटी उत्सव’ मोठ्या उत्साहात संपन्न
श्री क्षेत्र त्रिपुटी (ता. कोरेगाव) येथील श्रीनाथ संस्थानात परब्रह्म सद्गुरू गोपालनाथ महाराज यांचा ‘वैशाखी उटी’ आणि ‘वसंत पूजन’ समारंभ आज मोठ्या भक्तीभावात आणि उत्साहात पार पडला. या निमित्ताने ह.भ.प. शंकर महाराज मोरे (आळंदी) यांचे सुश्राव्य कीर्तन आणि विविध धार्मिक कार्यक्रमांचे आयोजन करण्यात आले होते.
स्थैर्य, सातारा, दि. १८ : श्री क्षेत्र त्रिपुटी (ता. कोरेगाव) येथील परब्रह्म सद्गुरू गोपालनाथ महाराज यांचा उटी व वसंत पूजन समारंभ आज (१८ मे) मोठ्या उत्साहात साजरा करण्यात आला. या पवित्र सोहळ्यासाठी पंचक्रोशीतील भाविकांनी मोठी गर्दी केली होती.
धार्मिक विधी आणि महापूजा
आज सकाळी श्रीनाथ महाराजांच्या संजीवन समाधीस केशर, अत्तर, अष्टगंध आणि चंदन आदी सुगंधी द्रव्यांचा वापर करून विशेष ‘गंधलेपन’ (उटी) करण्यात आले. यानंतर समाधीवर शीतोपचार, पवमान पंचसूक्त आणि रुद्राभिषेक करत महापूजा संपन्न झाली.
सुश्राव्य कीर्तन आणि महाप्रसाद
या उत्सवानिमित्त आळंदीचे ह.भ.प. शंकर महाराज मोरे यांच्या सुश्राव्य कीर्तनाचे आयोजन करण्यात आले होते. कीर्तनाचा आणि उटी लेपनाचा नयनरम्य सोहळा अनुभवण्यासाठी भाविक आणि ग्रामस्थ मोठ्या संख्येने उपस्थित होते. कीर्तन सेवेनंतर सर्व उपस्थितांना महाप्रसादाचे वाटप करण्यात आले.
मान्यवरांची उपस्थिती
या मंगलमय सोहळ्याला श्री क्षेत्र त्रिपुटीचे मठाधिपती गुरुनाथ महाराज घोलप, श्रीपाद महाराज घोलप, गुरुसेवक चंद्रकांत भोसले (भोसलेवाडी), पोपटराव भोसले (वाणेवाडी, सोमेश्वरनगर), ओंकार जोशी, अमेय जोशी, श्रीकांत जोशी (ल्हासुणे), वेदांत घोलप आदी मान्यवरांसह भाविक मोठ्या संख्येने उपस्थित होते.
