‘उमेद’ अभियानाची साताऱ्यात मोठी झेप; १ लाख ९० हजार महिला झाल्या ‘लखपती दिदी’

महाराष्ट्र राज्य ग्रामीण जीवनोन्नती अभियानांतर्गत (उमेद) सातारा जिल्ह्यातील १ लाख ९० हजार महिला लखपती झाल्या आहेत. विविध निधी आणि बँक अर्थसहाय्याच्या माध्यमातून ग्रामीण महिला आर्थिकदृष्ट्या सक्षम बनल्या आहेत.

स्थैर्य, सातारा, दि. १५ एप्रिल : महाराष्ट्र राज्य ग्रामीण जीवनोन्नती अभियानांतर्गत (उमेद) सातारा जिल्ह्याने महिला सक्षमीकरणाच्या दिशेने मोठी झेप घेतली आहे. जिल्ह्यात आतापर्यंत तब्बल १ लाख ९० हजार महिला ‘लखपती दिदी’ झाल्या असून, यामुळे त्यांच्या कुटुंबांच्या उदरनिर्वाहाचा स्तर लक्षणीयरीत्या उंचावला आहे. बँकांचे भक्कम अर्थसहाय्य आणि शासनाच्या विविध निधींच्या जोरावर सातारा जिल्ह्यातील ग्रामीण महिला आता खऱ्या अर्थाने आर्थिकदृष्ट्या सक्षम झाल्या आहेत.

२२ हजारांहून अधिक बचत गट आणि संघटन

सातारा जिल्ह्यात हे अभियान सुरू झाल्यापासून महिलांचे संघटन मोठ्या प्रमाणावर झाले आहे. आतापर्यंत जिल्ह्यात २२ हजार १८७ स्वयंसहाय्यता बचत गट तयार करण्यात आले असून, यामध्ये २ लाख २१ हजार ३८० कुटुंबांचा समावेश आहे. या अभियानांतर्गत आतापर्यंत २ हजार ३७७ बचत गटांच्या महिलांना त्यांचे स्वतःचे उद्योग उभारणीसाठी १२२ कोटी २६ लाख रुपयांचा निधी वितरित करण्यात आला आहे.

शासकीय निधीचे वितरण :

• फिरता निधी: २१ हजार ६६४ बचत गटांना ३२ कोटी ५१ लाख रुपये.

  

• ग्रामसंघ निधी: ३३३ ग्रामसंघांना ३ कोटी ७४ लाख रुपये.

  

• स्टार्टअप निधी: १ हजार २१४ गटांना ९ कोटी १० लाख रुपये.

  

• प्रभाग संघ निधी: ६२ प्रभाग संघांना २ कोटी १७ लाख रुपये.

बँकांचे १२५० कोटींहून अधिक अर्थसहाय्य

महिला बचत गटांना बँकांनीही मोठ्या प्रमाणावर हातभार लावला आहे.

• जिल्ह्यातील ५६ हजार ६२७ बचत गटांना तब्बल १२०० कोटी ६ लाख ६३ हजार रुपयांचे अर्थसहाय्य वितरित करण्यात आले आहे.

• तर, वैयक्तिक उद्योग आणि व्यवसायासाठी ६ हजार १६१ गटांना १०० कोटी ९ लाख रुपयांचे कर्ज देण्यात आले आहे.

उंबरठा ओलांडून महिला झाल्या उद्योजक

या अभियानामुळे ग्रामीण भागातील महिला केवळ घराचा उंबरठा ओलांडून बाहेर पडल्या नाहीत, तर त्या आता यशस्वी उद्योजक झाल्या आहेत. स्वतःच्या पायावर उभ्या राहिल्याने त्यांच्या कुटुंबाचा सामाजिक आणि आर्थिक स्तर उंचावण्यास मोठी मदत झाली आहे. जिल्ह्यातील या ‘लखपती दिदी’ आता केवळ शेतीवरच अवलंबून न राहता विविध प्रकारचे छोटे-मोठे व्यवसाय, गृहउद्योग आणि सेवा क्षेत्रात आपली एक वेगळी ओळख निर्माण करत आहेत.