आधार कार्डावरील नावात बदल करण्यासाठी UIDAI चे नवीन नियम लागू; जाणून घ्या महत्त्वाची प्रक्रिया
थेट WhatsApp वर मिळवा
UIDAI ने आधार कार्डावरील नाव दुरुस्ती, आडनाव बदल आणि नाव बदलासाठी नवीन नियमावली जाहीर केली असून योग्य पुराव्यांची पूर्तता करणे आता बंधनकारक आहे.
स्थैर्य,सातारा, दि. ०६ ऑक्टोबर : युनिक आयडेंटिफिकेशन अथॉरिटी ऑफ इंडियाने (UIDAI) आधार कार्डावरील नावात बदल आणि दुरुस्ती करण्यासाठी नवीन मानक कार्यप्रणाली (SOP) लागू केली आहे. या नवीन नियमांनुसार स्पेलिंगमधील चुका, इंग्रजी अक्षरांचा क्रम बदलणे, लग्नानंतरचे आडनाव बदलणे किंवा पूर्ण नाव बदलण्यासाठी विशेष मार्गदर्शक सूचना जारी करण्यात आल्या आहेत. सर्वसामान्यांना नावात बदल करताना येणाऱ्या अडचणी दूर करणे आणि बनावट कागदपत्रांना आळा घालणे हा यामागचा मुख्य उद्देश आहे.
नावातील छोट्या दुरुस्तीसाठी ओळखीचा पुरावा पुरेसा
नवीन एसओपीनुसार, नावातील किरकोळ चुका जसे की नावातील आद्याक्षरे (Initials) पूर्ण लिहिणे, नावात मधले नाव जोडणे किंवा काढणे आणि स्पेलिंगमधील छोट्या चुका दुरुस्त करण्यासाठी valid ओळखीचा पुरावा (PoI) सादर करावा लागेल. लग्नानंतर किंवा घटस्फोटानंतर महिलांना आडनाव बदलायचे असल्यास विवाह नोंदणी प्रमाणपत्र किंवा विहित नमुन्यातील प्रतिज्ञापत्र (Affidavit) देऊन नाव अपडेट करता येणार आहे.
पूर्ण नाव बदलासाठी गॅझेट नोटिफिकेशन अनिवार्य
ज्या नागरिकांना आपले पूर्ण नाव किंवा ओळख बदलायची आहे, त्यांच्यासाठी केंद्र सरकारचे राजपत्र (Gazette Notification) अनिवार्य करण्यात आले आहे. याशिवाय डेटा एंट्री ऑपरेटरच्या चुकीमुळे नावात चूक झाली असल्यास योग्य प्रतिज्ञापत्रासह आधी दिलेले कागदपत्र जोडून ती दुरुस्त करता येईल. नाव अपडेट करण्यासाठी नागरिकांना जवळच्या आधार सेवा केंद्रात जाऊन अर्ज करावा लागेल.
