वाखरी पाटी येथे झालेल्या अपघातात दुचाकीस्वाराचा मृत्यू
स्थैर्य, फलटण, दि. १८ : फलटण पुसेगाव रोडवर वाखरी ता. फलटण येथील वाखरी पाटी येथे चारचाकी व दूचाकी यांच्यात झालेल्या अपघातात दूचाकीस्वाराचा मृत्यू झाला आहे. रोहिदास धनाजी लोखंडे वय ५५ रा. ढवळ ता. फलटण असे संबंधित दूचाकीस्वाराचे नाव आहे.
या बाबत फलटण ग्रामिण पोलिस ठाण्यातून मिळालेली माहिती अशी की, फलटण पुसेगाव रोडवर वाखरी पाटी येथे मंगळवार दि. १६ मार्च रोजी सात वाजण्याच्या सुमारास रोहिदास धनाजी लोखंडे हे दूचाकी क्र. एमएच ११ बीजे ७६७४ वरुन फलटणहून घरी निघाले होते. तेव्हा त्यांना फलटणकडे निघालेल्या चारचाकी क्र. एमएच ११ बीव्ही ८२७७ ने राँग साईडने येवून जोराची धडक दिली. या अपघातात रोहिदास लोखंडे हे गंभीर जखमी होवून त्यांचा मृत्यू झाला. या अपघात प्रकरणी कार चालक मेघनाथ विलास तांबे रा. ढवळ ता. फलटण यांच्या विरुध्द फलटण ग्रामीण पोलिस ठाण्यात गुन्हा नोंद झाला आहे. या बाबतची फिर्याद तुषार सुरेश लोखंडे वय ३० रा. ढवळ ता. फलटण यांनी दिली असून आधिक तपास पोलिस हवालदार कदम करित आहेत.
