रणजितदादांच्या माध्यमातून तरडगाव जिल्हा परिषद गटातील रस्त्यांच्या कामांना मंजुरी – ई-निविदा प्रसिद्ध
तरडगाव जिल्हा परिषद गटातील रस्त्यांच्या कामांना अखेर मंजुरी मिळाली असून सार्वजनिक बांधकाम विभागाने २ कोटी २५ लाखांच्या ई-निविदा प्रसिद्ध केल्या आहेत.
स्थैर्य, तरडगाव, दि. ०४ ऑगस्ट : गेल्या अनेक वर्षांपासून प्रलंबित असलेल्या तरडगाव जिल्हा परिषद गटातील रस्त्यांच्या कामांना अखेर मंजुरी मिळाली आहे. सार्वजनिक बांधकाम विभाग, सातारा यांच्या वतीने या कामांसाठी ई-निविदा प्रसिद्ध करण्यात आल्या असून लवकरच प्रत्यक्ष कामाला सुरुवात होणार आहे.
२.२५ कोटींच्या निधीतून रस्ते सुधारणा
सार्वजनिक बांधकाम विभागाच्या अल्पकालावधीच्या ई-निविदा सूचनेनुसार, फलटण तालुक्यातील तीन प्रमुख रस्त्यांच्या सुधारणेसाठी प्रत्येकी ७५ लाख रुपयांची तरतूद करण्यात आली आहे. यामध्ये मठाचीवाडी कारंडवस्ती ते चव्हाणवस्ती रस्ता, पाडेगाव ते फार्म ते राज्य मार्ग ११७ रस्ता आणि तरडगाव ते गायकवाडवस्ती मार्ग राबडी खुर्द या तीन रस्त्यांचा समावेश आहे. एकूण २ कोटी २५ लाख रुपये खर्चून ही कामे मार्गी लावली जाणार आहेत.
पाठपुरावा ठरला यशस्वी
या रस्त्यांच्या कामांसाठी माजी खासदार रणजितसिंह नाईक निंबाळकर, आमदार सचिन पाटील, नगराध्यक्ष समशेरसिंह नाईक निंबाळकर, सातारा जिल्हा परिषदेच्या माजी सदस्या जिजामाला नाईक निंबाळकर आणि स्वराज पतसंस्थेचे चेअरमन अमरसिंह नाईक निंबाळकर यांनी सातत्याने शासनाकडे पाठपुरावा केला होता. त्यांच्या विशेष प्रयत्नांतून या कामांना मंजुरी मिळून निविदा प्रक्रिया सुरू झाली आहे.
ग्रामस्थांकडून आभार
अनेक वर्षांपासूनची प्रलंबित मागणी पूर्ण झाल्याने परिसरातील नागरिकांमध्ये समाधानाचे वातावरण आहे. या रस्ते विकासकामांना मंजुरी मिळवून दिल्याबद्दल तरडगावचे माजी उपसरपंच प्रशांत गायकवाड यांच्यासह तरडगाव गटातील सर्व ग्रामस्थांनी लोकप्रतिनिधींचे विशेष आभार मानले आहेत.
