रेशन कार्डवर PHH आणि AAY म्हणजे काय? जाणून घ्या दरमहा मिळणाऱ्या मोफत धान्याचे नियम
थेट WhatsApp वर मिळवा
रेशन कार्डवर प्राधान्य कुटुंब आणि अंत्योदय अन्न योजना श्रेणीनुसार दरमहा मिळणाऱ्या धान्याचे प्रमाण भिन्न असून याचे नियम समजून घेणे महत्त्वाचे ठरते.
स्थैर्य, सातारा, दि. २१ सप्टेंबर : राष्ट्रीय अन्नसुरक्षा कायद्यांतर्गत रेशन दुकानातून मिळणाऱ्या धान्याबाबत नागरिकांमध्ये अनेकदा गोंधळ दिसून येतो. रेशन कार्डवर नमूद प्राधान्य कुटुंब आणि अंत्योदय अन्न योजना या दोन्ही श्रेणींनुसार दरमहा मिळणाऱ्या मोफत धान्याचे प्रमाण वेगळे असून, नागरिकांनी आपल्या कार्डच्या वर्गवारीनुसार धान्याची अचूक माहिती घेणे आवश्यक आहे.
प्राधान्य कुटुंब आणि अंत्योदय योजनेतील मुख्य फरक
प्राधान्य कुटुंब म्हणजेच पीएचएच (PHH) रेशन कार्डधारकांना कुटुंबातील प्रत्येक व्यक्तीनुसार दरमहा ५ किलो धान्य मोफत दिले जाते. दुसरीकडे अंत्योदय अन्न योजना म्हणजेच एएवाय (AAY) रेशन कार्ड हे समाजातील अत्यंत गरजू कुटुंबांसाठी असून, या कार्डवर सदस्यांच्या संख्येचा विचार न करता प्रति कुटुंब दरमहा ३५ किलो धान्य दिले जाते.
धान्य वाटपाचे नियम आणि बायोमेट्रिक पडताळणी
केंद्र सरकारच्या प्रधानमंत्री गरीब कल्याण अन्न योजनेअंतर्गत पात्र लाभार्थ्यांना मोफत धान्य वितरीत केले जात आहे. रेशन दुकानातून धान्य घेताना बायोमेट्रिक पडताळणी अनिवार्य करण्यात आली असून, नागरिकांनी आपल्या हक्काचे धान्य रेशन दुकानातून प्राप्त करून घ्यावे असे आवाहन अन्न पुरवठा विभागाकडून करण्यात आले आहे.
