रविवार पेठ येथील तालीम गणपती मंदिराचा जीर्णोद्धार पूर्ण; २२ ते २४ एप्रिल दरम्यान भव्य लोकार्पण व कलशारोहण सोहळा!

फलटण येथील रविवार पेठेतील तालीम गणपती मंदिराचा जीर्णोद्धार पूर्ण झाला असून, दि. २२ ते २४ एप्रिल दरम्यान रामराजे नाईक निंबाळकर व इतर मान्यवरांच्या उपस्थितीत भव्य लोकार्पण व कलशारोहण सोहळ्याचे आयोजन करण्यात आले आहे.

स्थैर्य, फलटण, दि. 20 एप्रिल : शहरातील रविवार पेठ (गोविंद प्लाझा समोर) येथील आराध्य दैवत असलेल्या ‘तालीम गणपती’ मंदिराचा जीर्णोद्धार पूर्ण झाला आहे. या निमित्ताने मंदिराचा भव्य लोकार्पण व कलशारोहण सोहळा मोठ्या उत्साहात साजरा करण्यात येणार असून, बुधवार दि. २२ ते शुक्रवार दि. २४ एप्रिल दरम्यान विविध धार्मिक कार्यक्रमांचे आयोजन करण्यात आले आहे. सलग तीन दिवस चालणाऱ्या या सोहळ्यामुळे संपूर्ण परिसरात अत्यंत भक्तीमय वातावरण निर्माण होणार आहे.

मान्यवरांच्या हस्ते लोकार्पण आणि कलशारोहण:

या नूतन मंदिराचा लोकार्पण सोहळा विधान परिषद माजी सभापती श्रीमंत रामराजे नाईक निंबाळकर यांच्या शुभहस्ते पार पडणार आहे. तर, मंदिराचे कलशारोहण प.पू. सुंदरगिरी महाराज आणि संभाजी भिडे यांच्या हस्ते होणार आहे.

या मंगलमय सोहळ्याचे अध्यक्षस्थान श्रीमंत संजीवराजे नाईक निंबाळकर भूषविणार आहेत. तसेच याप्रसंगी श्रीमंत रघुनाथराजे नाईक निंबाळकर, फलटणचे नगराध्यक्ष समशेरसिंह नाईक निंबाळकर, अनिकेतराजे नाईक निंबाळकर, सह्याद्री कदम, विश्वजीतराजे नाईक निंबाळकर, दिलीपसिंह भोसले, हेमंत निंबाळकर, सचिन यादव, पंकज पवार, सौ. कविता मदने आदी मान्यवरांची प्रमुख उपस्थिती राहणार आहे.

धार्मिक कार्यक्रमांचे सविस्तर वेळापत्रक:

• बुधवार, दि. २२ एप्रिल :

  • सकाळी ११ ते दुपारी २ : श्रींच्या मूर्ती व कलश आगमन.

    

  • सायंकाळी ५ ते ९ : शहरातून नगर प्रदक्षिणा व भव्य कलश शुभयात्रा.

    

  • रात्री ९ ते १० : दशविध स्नान व ध्यानाधिवास.

• गुरुवार, दि. २३ एप्रिल :

  • दुपारी १२ ते ०१.३० : विरशैव महिला भजनी मंडळ यांचे भजन.

  • सायंकाळी ४ : संकल्प, पुण्याहवाचन, जलाभिषेक, जलदिवास, उदकशांती व मुख्य देवता स्थापना पूजन.

  • रात्री ९ ते ११ : माणकेश्वर भजनी मंडळ यांचे सुश्राव्य भजन.

• शुक्रवार, दि. २४ एप्रिल :

  • सकाळी १० : मंदिर वास्तुशांती व हवन पूर्णाहुती.

  • दुपारी ४ : मूर्ती व कलश प्रतिष्ठापना.

  • सायंकाळी ५ : श्रींची महाआरती.

  • सायंकाळी ६ : भाविकांसाठी महाप्रसाद.

उपस्थितीचे आवाहन:

रविवार पेठ तालीम गणपती मंडळाचे अध्यक्ष नितीन चोरमले, उपाध्यक्ष किरण शहाणे आणि मार्गदर्शक मोहनराव पोतेकर यांनी सर्व भाविक, नागरिक आणि गणेश भक्तांना या तीन दिवसीय धार्मिक कार्यक्रमास आणि महाप्रसादाचा लाभ घेण्यासाठी मोठ्या संख्येने उपस्थित राहण्याचे आवाहन केले आहे.