स्पर्धा परीक्षेत दुधेबावीचा डंका; सुप्रिया आडके यांची राज्य कर निरीक्षकपदी निवड
महाराष्ट्र लोकसेवा आयोगाच्या माध्यमातून दुधेबावी येथील सुप्रिया आडके यांची राज्य कर निरीक्षकपदी (STI) निवड झाली आहे. या यशाबद्दल सर्वत्र कौतुक होत आहे.
स्थैर्य, फलटण, दि. 17 ऑगस्ट : महाराष्ट्र लोकसेवा आयोगाच्या (MPSC) माध्यमातून घेण्यात आलेल्या स्पर्धा परीक्षेत दुधेबावी (ता. फलटण) येथील सुप्रिया संपत आडके यांनी घवघवीत यश संपादन केले आहे. या परीक्षेतून त्यांची राज्य कर निरीक्षक (STI) पदी निवड झाली असून, त्यांच्या या यशाबद्दल परिसरातून मोठे कौतुक केले जात आहे.
जिद्द आणि मेहनतीला यश
सुप्रिया आडके यांचे प्राथमिक शिक्षण बोरकरवाडी येथील जिल्हा परिषद प्राथमिक शाळेत झाले. त्यानंतर त्यांनी तिरकवाडी येथील जय भवानी हायस्कूलमध्ये माध्यमिक आणि फलटणच्या मुधोजी हायस्कूलमध्ये उच्च माध्यमिक शिक्षण पूर्ण केले. शालेय जीवनापासूनच त्यांनी अभ्यासात सातत्य राखले होते.
इंजिनिअरिंगनंतर प्रशासकीय सेवेत
उच्च शिक्षण घेताना सुप्रिया यांनी सांगली येथील वालचंद कॉलेज ऑफ इंजिनिअरिंगमधून बी.टेक. ची पदवी संपादन केली. इंजिनिअरिंगचे शिक्षण पूर्ण केल्यानंतर त्यांनी स्पर्धा परीक्षेची तयारी सुरू केली होती. त्यांच्या या सातत्यपूर्ण प्रयत्नांना आता मोठे यश मिळाले असून, या निवडीबद्दल दुधेबावी ग्रामस्थांसह विविध क्षेत्रांतील मान्यवरांकडून त्यांचे अभिनंदन केले जात आहे.
