सातारा जिल्ह्यासाठी मोठी बातमी! नागेवाडीत उभारला जाणार ‘आयटी पार्क’; मंत्रिमंडळ बैठकीत ४२.५५ हेक्टर जमिनीला मंजुरी
थेट WhatsApp वर मिळवा
सातारा जिल्ह्यातील नागेवाडी येथे आयटी पार्क उभारण्यासाठी ४२.५५ हेक्टर जमीन एमआयडीसीला देण्याचा महत्त्वपूर्ण निर्णय आज मुख्यमंत्री देवेंद्र फडणवीस यांच्या अध्यक्षतेखाली झालेल्या मंत्रिमंडळ बैठकीत घेण्यात आला. यामुळे युवकांना रोजगाराच्या नव्या संधी उपलब्ध होणार आहेत.
स्थैर्य, सातारा, दि. 22 एप्रिल : सातारा जिल्ह्याच्या औद्योगिक आणि तंत्रज्ञान क्षेत्रातील विकासाला मोठी चालना देणारा एक अत्यंत महत्त्वाचा आणि ऐतिहासिक निर्णय आज राज्य शासनाने घेतला आहे. सातारा जिल्ह्यातील मौजे नागेवाडी येथे नवीन ‘आय. टी. पार्क’ (IT Park) उभारण्यासाठी राज्य शासनाच्या महसूल विभागाकडून महाराष्ट्र औद्योगिक विकास महामंडळास (MIDC) ४२.५५ हेक्टर जमीन देण्यास आज राज्य मंत्रिमंडळाच्या बैठकीत अधिकृत मंजुरी देण्यात आली आहे.
युवकांसाठी रोजगार आणि व्यवसायाच्या नव्या संधी:
पुणे आणि बंगळुरूच्या धर्तीवर सातारा जिल्ह्यातही माहिती तंत्रज्ञान (IT) क्षेत्राला प्रोत्साहन देण्याच्या उद्देशाने हा निर्णय घेण्यात आला आहे. नागेवाडी येथे हा आयटी पार्क उभारला गेल्यामुळे सातारा जिल्हा आणि परिसरातील आयटी क्षेत्राचा वेगाने विकास होईल. तसेच, या प्रकल्पामुळे जिल्ह्यातील हजारो उच्चशिक्षित युवकांना स्थानिक पातळीवरच मोठ्या प्रमाणावर रोजगार आणि व्यवसायाच्या नवीन संधी उपलब्ध होणार आहेत. यामुळे आयटी क्षेत्रातील रोजगारासाठी पुणे किंवा मुंबईकडे जाणारा स्थानिक युवकांचा ओढा काही प्रमाणात कमी होण्यास नक्कीच मदत होईल.
मंत्रिमंडळ बैठकीतील उपस्थिती:
राज्याचे मुख्यमंत्री देवेंद्र फडणवीस यांच्या अध्यक्षतेखाली आज पार पडलेल्या मंत्रिमंडळ बैठकीत महसूल विभागाच्या या प्रस्तावावर सविस्तर चर्चा होऊन त्यास अंतिम मंजुरी देण्यात आली. या महत्त्वपूर्ण बैठकीस राज्याचे उपमुख्यमंत्री एकनाथ शिंदे, सार्वजनिक बांधकाम मंत्री श्रीमंत छत्रपती शिवेंद्रसिंहराजे भोसले, ग्रामविकास मंत्री जयकुमार गोरे यांच्यासह राज्य मंत्रिमंडळातील इतर विविध मंत्री मोठ्या संख्येने उपस्थित होते.
सातारा जिल्ह्यासाठी आणि विशेषतः येथील तरुण पिढीसाठी हा निर्णय अत्यंत फलदायी ठरणार असून, लवकरच या आयटी पार्कच्या उभारणीला गती मिळेल अशी अपेक्षा व्यक्त केली जात आहे.
