श्रीमंत रामराजे व खासदार रणजितसिंह सांगोल्यात एकाच मंचावर

दैनिक स्थैर्य | दि. 13 ऑगस्ट 2023 | फलटण | सांगोला येथे माजी मंत्री स्व. गणपतराव देशमुख यांच्या जयंती निमित्त आयोजित कार्यक्रमात विधानपरिषदेचे माजी सभापती तथा विद्यमान आमदार श्रीमंत रामराजे नाईक निंबाळकर व माढा लोकसभा मतदारसंघाचे खासदार रणजितसिंह नाईक निंबाळकर हे एकाच मंचावर उपस्थित आहेत. त्यामुळे फलटणमध्ये विविध चर्चाना उधाण आले आहे.

राज्यामध्ये गेल्या काही महिन्यापूर्वी झालेल्या उलथापालथीमध्ये उपमुख्यमंत्री अजितदादा पवार यांच्यासोबत जाण्याचा निर्णय हा श्रीमंत रामराजे नाईक निंबाळकर यांच्या गटाने घेतला आहे. त्यामुळे विधानसभा मतदारसंघात कामकाज करीत असताना कट्टर विरोधक एकाच मंचावर येणार का ? असा प्रश्न उपस्थित राहिला होता. आज सांगोला येथे झालेल्या कार्यक्रमात श्रीमंत रामराजे नाईक निंबाळकर व खासदार रणजितसिंह नाईक निंबाळकर दोघेही एकाच मंचावर दिसल्याने आता आगामी होणाऱ्या निवडणुकीत सुद्धा महायुती दिसणार का ? असा प्रश्न उपस्थित राहत आहे.

सांगोला येथे होत असलेल्या कार्यक्रमात माजी केंद्रीय कृषी मंत्री व राज्यसभा खासदार शरद पवार व उपमुख्यमंत्री देवेंद्र फडणवीस हे सुद्धा माजी मंत्री स्व. गणपतराव देशमुख यांच्या जयंती निमित्त आयोजित कार्यक्रमात एकाच मंचावर होते.