श्रावणी पौर्णिमा म्हणजे स्मरण, चिंतन आणि धम्माचरणाची तिथी : सोमीनाथ घोरपडे
थेट WhatsApp वर मिळवा
विडणी येथे वर्षावास प्रवचन मालिकेअंतर्गत धम्मप्रवचन; अंगुलीमालाच्या परिवर्तनासह बौद्ध धम्मातील महत्त्वपूर्ण घटनांवर विवेचन
स्थैर्य, फलटण, दि. ३० ऑगस्ट : श्रावणी पौर्णिमा ही केवळ उत्सवाची तिथी नसून स्मरण, चिंतन, आत्मपरीक्षण आणि धम्माचरणाची तिथी आहे. बुद्धांचा धम्म माणसाला हिंसेपासून अहिंसेकडे, क्रौर्यापासून करुणेकडे आणि अज्ञानापासून प्रज्ञेकडे घेऊन जाणारा मार्ग आहे, असे प्रतिपादन भारतीय बौद्ध महासभा, शाखा सातारा जिल्हा पूर्वचे संस्कार सचिव सोमीनाथ घोरपडे यांनी केले.
संघमित्र तरुण मंडळ, विडणी आणि भारतीय बौद्ध महासभा, शाखा फलटण तालुक्याच्या माजी कार्यकारिणीच्या वतीने विडणी येथे वर्षावास प्रवचन मालिकेअंतर्गत श्रावणी पौर्णिमेनिमित्त धम्मप्रवचनाचे आयोजन करण्यात आले होते. यावेळी घोरपडे यांनी ‘श्रावणी पौर्णिमेचे बौद्ध धम्मातील महत्त्व’ या विषयावर मार्गदर्शन केले.
श्रावणी पौर्णिमेचे महत्त्व उलगडले
प्रवचनात घोरपडे यांनी उरुवेला काश्यप, नदी काश्यप आणि गया काश्यप या बंधूंचे धम्मात आगमन, अंगुलीमालाचे हृदयपरिवर्तन, प्रथम धम्मसंगीती तसेच धम्मनिष्ठ उपासक अनाथपिंडकाचे योगदान याविषयी माहिती दिली.
अनाथपिंडकाने १६० सुत्ते तोंडपाठ करून धम्माच्या अभ्यासासाठी दिलेल्या योगदानाचाही त्यांनी उल्लेख केला. बौद्ध धम्मातील विविध घटनांचा संदर्भ देत श्रावणी पौर्णिमेचे महत्त्व त्यांनी उपस्थितांसमोर मांडले.
‘हिंसेपासून अहिंसेकडे नेणारा बुद्धांचा धम्म’
अंगुलीमालाच्या जीवनातील परिवर्तनाचा दाखला देताना बुद्धांच्या विचारातील करुणा, अहिंसा आणि प्रज्ञेचे महत्त्व घोरपडे यांनी स्पष्ट केले. धम्माचा विचार केवळ ऐकण्यापुरता मर्यादित न ठेवता तो आचरणात आणण्याची आवश्यकता असल्याचे त्यांनी सांगितले.
कार्यक्रमात फलटण तालुक्याचे माजी संस्कार सचिव तथा बौद्धाचार्य अमोल भोसले यांनी वंदना सूत्राचे सामुदायिक पठण करून घेतले. माजी तालुकाध्यक्ष महावीर भालेराव यांनी प्रास्ताविक करत माजी पदाधिकाऱ्यांच्या माध्यमातून तालुक्यात सुरू असलेल्या धम्मकार्याची भूमिका स्पष्ट केली.
बौद्ध उपासक-उपासिकांची उपस्थिती
कार्यक्रमाला माजी तालुकाध्यक्ष महावीर भालेराव, माजी सरचिटणीस बाबासाहेब जगताप, माजी प्रचार व पर्यटन उपाध्यक्ष रामचंद्र मोरे, माजी संस्कार सचिव बजरंग गायकवाड, अमोल भोसले, धम्ममित्र धाईंजे, संघमित्र तरुण मंडळाचे कैलास जगताप यांच्यासह मंडळाचे कार्यकर्ते, बौद्ध उपासक-उपासिका आणि बालक-बालिका मोठ्या संख्येने उपस्थित होते.
कार्यक्रमाची सांगता धम्मपालन गाथेने झाली. संघमित्र तरुण मंडळाच्या वतीने उपस्थितांना भोजनदान करण्यात आले.
विडणीतील वर्षावास प्रवचन मालिकेत सोमीनाथ घोरपडे यांनी श्रावणी पौर्णिमेचे बौद्ध धम्मातील महत्त्व उलगडले; अंगुलीमालाचे परिवर्तन, प्रथम धम्मसंगीती आणि अनाथपिंडकाच्या योगदानावर केले विवेचन.
