लोककल्याणकारी कामांतून जनतेचे प्रश्न सोडवा; पालकमंत्री शंभूराज देसाई यांचे पाटण पंचायत समितीला निर्देश
थेट WhatsApp वर मिळवा
पाटण पंचायत समितीला भेट देऊन पालकमंत्री शंभूराज देसाई यांनी अधिकाऱ्यांना व सदस्यांना लोकहिताची कामे करण्याचे आणि नागरिकांच्या तक्रारींचा त्वरित निपटारा करण्याचे कडक निर्देश दिले.
स्थैर्य, पाटण, दि. ३१ मार्च : पाटण पंचायत समितीच्या सदस्यांनी लोकहिताची व कल्याणकारी कामे करून जनतेला दिलासा द्यावा. तसेच, ‘पालकमंत्री कार्यालय आपल्या दारी’ व ‘जनता दरबार’च्या माध्यमातून येणाऱ्या तक्रारींचा त्वरित निपटारा करावा, असे आवाहन राज्याचे मंत्री आणि सातारा जिल्ह्याचे पालकमंत्री शंभूराज देसाई यांनी केले आहे.
गटतट विसरून सर्वांच्या हिताची कामे करा
पालकमंत्री शंभूराज देसाई यांनी नुकतीच पाटण पंचायत समितीला सदिच्छा भेट दिली. यावेळी प्रांताधिकारी सोपान टोम्पे, तहसीलदार अनंत गुरव, पंचायत समितीच्या सभापती सविता पवार, उपसभापती विजय पवार आणि गटविकास अधिकारी सरिता पवार यांच्यासह विविध विभागप्रमुख उपस्थित होते. पंचायत समितीत काम करताना गटतट विसरून सर्वांच्या हिताची कामे करावीत, तसेच केंद्र व राज्य शासनाच्या विविध योजनांचा लाभ तळागाळातील लोकांपर्यंत पोहोचवावा, अशी सूचना त्यांनी केली.
नागरिकांच्या सोयीसाठी दिशादर्शक फलक लावावेत
तक्रारी कमी होण्यासाठी शिस्तबद्ध काम करावे आणि दरमहा कामांचा आढावा घ्यावा. प्रत्येक सोमवारी विभागप्रमुखांनी कार्यालयात हजर राहून नागरिकांच्या तक्रारी सोडवाव्यात. ज्या तक्रारी स्थानिक पातळीवर सुटत नसतील, त्या जिल्हास्तरावर सोडवण्यात येतील, असे ते म्हणाले.
“पंचायत समिती सदस्यांनी शाळा व प्राथमिक आरोग्य केंद्रांना अचानक भेटी देऊन पाहणी करावी. नागरिकांना त्रास होऊ नये यासाठी प्रत्येक अधिकारी व कर्मचाऱ्याच्या टेबलवर ‘नेमप्लेट’ आणि कार्यालयात दिशादर्शक फलक लावावेत. निधीबाबत पाटण पंचायत समितीसाठी सकारात्मक निर्णय घेतले जातील.” – शंभूराज देसाई, पालकमंत्री
पाटण शहरात ‘एकेरी वाहतूक’ शक्यतेची पाहणी
याच बैठकीत पालकमंत्री देसाई यांनी पाटण शहरांतर्गत रस्त्यांच्या कामांचाही आढावा घेतला. पाटण शहरात ‘एकेरी वाहतूक’ (One Way) सुरू करता येईल का, याची पाहणी प्रांताधिकारी, नगरपंचायतीचे मुख्याधिकारी आणि संबंधित अधिकाऱ्यांनी करावी. जर शहरात एकेरी वाहतूक करणे शक्य असल्यास तसा अहवाल द्यावा, नागरिकांच्या हिताच्या दृष्टीने याबाबत योग्य तो निर्णय घेतला जाईल, असेही त्यांनी स्पष्ट केले.
