सातारा सिंचन मंडळाची ‘आपत्ती व्यवस्थापन कार्यशाळा’ उत्साहात संपन्न; अधिकारी-कर्मचाऱ्यांनी गिरवले आपत्कालीन बचावाचे धडे

सातारा जिल्ह्याच्या पश्चिम भागातील अतिवृष्टीच्या पार्श्वभूमीवर जलसंपदा विभागाची सज्जता वाढवण्यासाठी ‘पुण्यश्लोक अहिल्यादेवी होळकर जलव्यवस्थापन कृती पंधरवड्या’निमित्त विशेष ‘आपत्ती व्यवस्थापन कार्यशाळा’ संपन्न झाली.

स्थैर्य, सातारा, दि. २७ : सातारा जिल्ह्याचा पश्चिम भाग हा प्रामुख्याने अतिवृष्टीप्रवण क्षेत्रात येत असल्याने, आगामी पावसाळ्याच्या पार्श्वभूमीवर जलसंपदा विभागाची सज्जता वाढवण्यासाठी एका विशेष कार्यशाळेचे आयोजन करण्यात आले होते. ‘पुण्यश्लोक अहिल्यादेवी होळकर जलव्यवस्थापन कृती पधंरवडा – २०२६’ अंतर्गत कोयना सिंचन विभाग (कोयनानगर) व लघु पाटबंधारे विभाग (सातारा) यांच्या संयुक्त विद्यमाने जिल्हाधिकारी कार्यालयातील नियोजन भवन येथे ही ‘आपत्ती व्यवस्थापन कार्यशाळा’ उत्साहात पार पडली.

कार्यक्रमाची सुरुवात पुण्यश्लोक अहिल्यादेवी होळकर यांच्या प्रतिमेचे पूजन व दीपप्रज्वलनाने करण्यात आली.

तज्ज्ञांचे मार्गदर्शन आणि प्रत्यक्ष प्रात्यक्षिके

या कार्यशाळेत आपत्ती व्यवस्थापन क्षेत्रातील नामवंत मार्गदर्शकांनी उपस्थित अधिकारी व कर्मचाऱ्यांना प्रशिक्षित केले:

• विवेक नायडू व लखन गायकवाड (मास्टर ट्रेनर, यशदा पुणे) : यांनी आपत्ती काळातील तांत्रिक बाबी आणि अचूक नियोजनावर प्रकाश टाकला.

  

• देविदास ताम्हाणे (जिल्हा आपत्ती व्यवस्थापन विभाग, सातारा) : यांनी आपत्कालीन परिस्थितीत स्थानिक पातळीवरील समन्वयाचे महत्त्व समजावून सांगितले.

  

• सुनील पारधे (लीडिंग फायरमन, सातारा) : यांनी आग आणि बचावात्मक उपाययोजनांची सविस्तर माहिती दिली.

या कार्यशाळेत केवळ ‘थिअरी’वर भर न देता अग्निशमन व आपत्कालीन बचावकार्याची प्रत्यक्ष प्रात्यक्षिके (Demos) सादर करण्यात आली. पूरस्थिती, अतिवृष्टी आणि आगीच्या घटनांमध्ये तात्काळ प्रतिसाद कसा द्यावा, याचे कौशल्य कर्मचाऱ्यांनी यावेळी आत्मसात केले.

‘जीवित व वित्तहानी टाळण्यासाठी समन्वय आवश्यक’

“सातारा जिल्ह्यात दरवर्षी होणारी अतिवृष्टी पाहता, जीवित व वित्तहानी टाळण्यासाठी जलसंपदा विभाग आणि जिल्हा प्रशासन यांच्यात प्रभावी समन्वय असणे अत्यंत गरजेचे आहे. ही कार्यशाळा अधिकारी व कर्मचाऱ्यांना आपत्तीच्या काळात जलद आणि अचूक निर्णय घेण्यासाठी निश्चितच उपयुक्त ठरेल.”

– अभय काटकर (अधीक्षक अभियंता)

मान्यवरांची उपस्थिती

याप्रसंगी कार्यकारी अभियंता महेश रासनकर, वरुण मोटे, योगेश शिंदे, अमर काशीद तसेच उपअभियंता अक्षय पाटील, जयवंत बर्गे आणि सातारा सिंचन मंडळ व सातारा पाटबंधारे प्रकल्प मंडळाच्या अधिपत्याखालील सर्व उपविभागीय कार्यालयांतील अधिकारी व कर्मचारी मोठ्या संख्येने उपस्थित होते.