नागोया आशियाई स्पर्धेत साताऱ्याचा डंका; खेळाडूंच्या स्वागतासाठी सोमवारी भव्य गौरव रॅली
थेट WhatsApp वर मिळवा
नागोया आशियाई क्रीडा स्पर्धेत साताऱ्याचे नाव उंचावणाऱ्या खेळाडूंसाठी सोमवारी भव्य गौरव रॅलीचे आयोजन करण्यात आले आहे. यात हजारो विद्यार्थी सहभागी होतील.
स्थैर्य, सातारा, दि. ०४ ऑक्टोबर : जपानमधील नागोया येथे सुरू असलेल्या २० व्या आशियाई क्रीडा स्पर्धेत चमकदार कामगिरी करणाऱ्या सातारा जिल्ह्यातील तिरंदाज साहिल जाधव, फुटबॉलपटू ऋतुजा पिसाळ आणि धावपटू सुदेष्णा शिवणकर यांच्या स्वागतासाठी सोमवारी (५ ऑक्टोबर) भव्य गौरव रॅलीचे आयोजन करण्यात आले आहे. जिल्हा क्रीडाधिकारी कार्यालयाच्या वतीने या भव्य सत्कार समारंभाचे नियोजन करण्यात आले आहे.
अडीच हजार विद्यार्थ्यांचा सहभाग
जिल्हा क्रीडा अधिकारी पल्लवी धात्रक यांनी दिलेल्या माहितीनुसार, या गौरव रॅलीमध्ये विविध खेळांतील राष्ट्रीय व आंतरराष्ट्रीय खेळाडू, मार्गदर्शक, संघटक तसेच २० शाळा, ५ महाविद्यालये आणि क्रीडा अकादमींचे सुमारे अडीच हजार विद्यार्थी मोठ्या उत्साहाने सहभागी होणार आहेत. या रॅलीच्या माध्यमातून आंतरराष्ट्रीय स्तरावर यश मिळवणाऱ्या खेळाडूंच्या पाठीवर कौतुकाची थाप दिली जाणार आहे.
गांधी मैदानावरून निघणार रॅली
ही रॅली सकाळी साडेसात वाजता गांधी मैदानावरून सुरू होईल. राजपथावरून छत्रपती शाहू महाराज चौक, रयत शिक्षण संस्था, पोवई नाका, तहसीलदार कार्यालय आणि नेताजी सुभाषचंद्र बोस चौकामार्गे छत्रपती शाहू जिल्हा क्रीडा संकुलात या रॅलीचा समारोप होईल. तेथे मान्यवरांच्या हस्ते खेळाडूंचा भव्य सत्कार केला जाईल. या रॅलीत जिल्हाधिकारी संतोष पाटील, मुख्य कार्यकारी अधिकारी याशनी नागराजन आणि पोलीस अधीक्षक निखिल पिंगळे यांच्यासह नागरिक मोठ्या संख्येने उपस्थित राहणार आहेत.
