दिवाळीच्या सुट्ट्यांमुळे महाबळेश्वर पर्यटकांनी फुलले; वेण्णालेक परिसरात सहा किलोमीटरपर्यंत वाहनांच्या रांगा
थेट WhatsApp वर मिळवा
दिवाळीच्या सणासुदीच्या कालावधीत गुलाबी थंडी आणि निसर्गरम्य वातावरण अनुभवण्यासाठी पर्यटकांनी प्रसिद्ध हिल स्टेशन महाबळेश्वर गर्दी केली आहे. मात्र, मोठ्या प्रमाणात वाढलेल्या वाहनसंख्येमुळे आणि पर्यटकांच्या गर्दीमुळे वेण्णालेक परिसरात तब्बल सहा किलोमीटरपर्यंत वाहतूक कोंडी झाल्याचे पाहायला मिळाले आहे.
स्थैर्य,सातारा, दि. १५ नोव्हेंबर : दिवाळीच्या सुट्ट्यांमध्ये पर्यटकांचे आवडते ठिकाण असलेल्या महाबळेश्वरमध्ये देश-विदेशातून पर्यटकांचा ओघ वाढला आहे. आल्हाददायक वातावरण, सूर्योदय-सूर्यास्ताचे विहंगम दृश्ये आणि निसर्गसौंदर्याचा आनंद घेण्यासाठी पर्यटकांची पावले या थंड हवेच्या ठिकाणाकडे वळली आहेत. यामुळे स्थानिक पर्यटन व्यवसायाला मोठी चालना मिळाली असून, हॉटेल आणि बाजारपेठांमध्ये ग्राहकांची रेलचेल वाढली आहे.
वेण्णालेकवर जत्रेचे स्वरूप आणि खाद्यसंस्कृती
महाबळेश्वरचे मुख्य आकर्षण असलेल्या वेण्णालेक परिसराला सध्या जत्रेचे स्वरूप प्राप्त झाले आहे. तलावावर नौकाविहाराचा आनंद घेण्यासाठी पर्यटकांच्या लांबच लांब रांगा लागल्या आहेत. याशिवाय केट्स पॉइंट, विल्सन पॉइंट, मुंबई पॉइंट, लिंगमळा धबधबा आणि ऐतिहासिक प्रतापगड येथेही पर्यटकांची मोठी गर्दी दिसून येत आहे. पर्यटकांकडून स्ट्रॉबेरीचे विविध पदार्थ, गरमागरम मक्याचे कणीस आणि स्थानिक खाद्यपदार्थांना मोठी पसंती दिली जात आहे. तसेच बाजारपेठेत गरम कपडे आणि स्थानिक उत्पादनांच्या खरेदीसाठी उत्साह पाहायला मिळत आहे.
वाहतूक कोंडीने पर्यटकांचे हाल
पर्यटकांच्या उच्चांकी गर्दीमुळे महाबळेश्वरमध्ये वाहतूक सुरळीत ठेवणे प्रशासनासमोर मोठे आव्हान ठरले आहे. वेण्णालेक ते महाबळेश्वर आणि लिंगमळा परिसरामध्ये तब्बल सहा किलोमीटरपर्यंत वाहनांच्या लांबच लांब रांगा लागल्याने पर्यटकांना तासनतास वाहतूक कोंडीचा सामना करावा लागत आहे. अनेक ठिकाणी रस्त्यांची कामे अपूर्ण असल्याने आणि खड्ड्यांमुळे पर्यटकांना प्रवासात नाहक त्रास सहन करावा लागत असून, प्रशासनाने यावर तातडीने उपाययोजना करावी, अशी मागणी होत आहे.
