शिष्यवृत्ती परीक्षेत साखरवाडी विद्यालयाचे मोठे यश; १६ विद्यार्थी गुणवत्ता यादीत
राज्य परीक्षा परिषदेच्या शिष्यवृत्ती परीक्षेत साखरवाडी शिक्षण संस्थेच्या १६ विद्यार्थ्यांनी मोठे यश मिळवले आहे. गुणवत्ता यादीत स्थान पटकावलेल्या विद्यार्थ्यांचे परिसरातून सर्वत्र कौतुक होत आहे.
स्थैर्य, साखरवाडी, दि. 17 ऑगस्ट : महाराष्ट्र राज्य परीक्षा परिषदेमार्फत घेण्यात आलेल्या इयत्ता चौथी, सातवी आणि आठवीच्या शिष्यवृत्ती परीक्षेत साखरवाडी शिक्षण संस्थेच्या विद्यार्थ्यांनी मोठे यश संपादन केले आहे. विद्यालयातील एकूण १६ विद्यार्थ्यांनी गुणवत्ता यादीत स्थान मिळवत जिल्हा शिष्यवृत्तीसाठी पात्रता मिळवली आहे.
प्राथमिक व माध्यमिक विभागाची उत्कृष्ट कामगिरी
इयत्ता चौथीच्या शिष्यवृत्ती परीक्षेसाठी विद्यालयातून २२ विद्यार्थी प्रविष्ट झाले होते. त्यापैकी प्रतीक्षा कैलास परकाळे ही विद्यार्थिनी शिष्यवृत्तीधारक ठरली असून प्राथमिक विभागाचा निकाल ७१ टक्के लागला आहे. माध्यमिक विभागात इयत्ता सातवीचे २९ विद्यार्थी परीक्षेला बसले होते, त्यापैकी ११ विद्यार्थ्यांनी शिष्यवृत्ती मिळवली आहे. सातवीचा निकाल ५१.७२ टक्के लागला आहे. तसेच इयत्ता आठवीच्या १४ विद्यार्थ्यांपैकी ४ विद्यार्थिनी गुणवत्ता यादीत झळकल्या आहेत.
यशस्वी विद्यार्थ्यांचे सर्वत्र कौतुक
सातवीतून मयुरी राऊत, सर्वेश जगताप, स्वरा कुचेकर, राजवीर फडतरे, वेदराज नलवडे, ज्ञानेश्वरी रणवरे, प्रणव पिसाळ, भार्गवी रणवरे, दिया चव्हाण, श्रेया पवार आणि शौर्य गायकवाड यांनी यश मिळवले. आठवीतून ईश्वरी जगदाळे, चैत्राली निकाळजे, निसर्गा कुऱ्हाडे आणि दूर्वा खराडे या शिष्यवृत्तीधारक ठरल्या आहेत. या सर्व यशस्वी विद्यार्थ्यांचे, त्यांना मार्गदर्शन करणाऱ्या शिक्षकांचे आणि मुख्याध्यापकांचे संस्थेचे विश्वस्त, संचालक व पदाधिकाऱ्यांकडून विशेष कौतुक करण्यात आले आहे.
