“उदय सामंत मित्र, पण ‘सहा महिन्याला पक्ष बदलणाऱ्यांच्या’ नादी लागून टीका केली…”; रणजितसिंहांचा टोला! नाईकबोमवाडी MIDC वरून रामराजेंचा ‘भांडाफोड’

“उद्योगमंत्री उदय सामंत चांगले मित्र आहेत, पण चुकीच्या संगतीमुळे ते बोलले. मुख्यमंत्र्यांनी नाईकबोमवाडी एमआयडीसी जाहीर केली आहे,” माजी खासदार रणजितसिंह नाईक निंबाळकर यांचा खुलासा. रामराजे नाईक निंबाळकर यांनी सभापती असताना एमआयडीसी रद्द करण्यासाठी घेतलेल्या बैठकीचे पुरावे सादर. वाचा सविस्तर…

स्थैर्य, फलटण, दि. 1 फेब्रुवारी : “राज्याचे उद्योगमंत्री उदय सामंत हे माझे अतिशय चांगले मित्र आहेत, त्यांच्या कार्यक्षमतेबद्दल दुमत नाही. परंतु, सहा-सहा महिन्याला पक्ष बदलणाऱ्यांच्या ‘संगतीला’ बसून त्यांनी साखरवाडी येथील सभेत माझ्यावर टीका केली असावी. राज्याचे मुख्यमंत्री देवेंद्र फडणवीस हे वरिष्ठ नेते आहेत, त्यांनी एखादा निर्णय घेतल्यावर कनिष्ठ मंत्र्यांना विचारण्याचा प्रश्नच उद्भवत नाही,” असा सडेतोड खुलासा आणि टोला माजी खासदार रणजितसिंह नाईक निंबाळकर (Ranjitsinh Naik Nimbalkar) यांनी लगावला.

सुरवडी (ता. फलटण) येथील हॉटेल निसर्गमध्ये आयोजित पत्रकार परिषदेत ते बोलत होते. यावेळी आमदार सचिन पाटील, सातारा जिल्हा बँकेचे संचालक तथा राष्ट्रवादीचे तालुकाध्यक्ष श्रीमंत शिवरूपराजे खर्डेकर, ज्येष्ठ नेते प्रल्हादराव (तात्या) साळुंखे-पाटील, फलटण तालुका संघर्ष समितीचे अध्यक्ष नरसिंह निकम, नगरसेवक सचिन अहिवळे, रोहित नागटिळे, संदीप चोरमले यांची प्रमुख उपस्थिती होती.

मुख्यमंत्र्यांनी स्पष्टोक्ती दिली आहे!

साखरवाडी येथील सभेत उदय सामंत यांनी केलेल्या टीकेचा समाचार घेताना रणजितसिंह म्हणाले, “मुख्यमंत्री देवेंद्र फडणवीस यांनी दाओस दौऱ्यावरून आल्यानंतर मला नाईकबोमवाडी एमआयडीसीबाबत (Naikbomwadi MIDC) फोनवरून माहिती दिली होती. याबाबत उद्योगमंत्र्यांना काही शंका असतील तर त्यांनी मुख्यमंत्र्यांशी समक्ष बोलून घ्यावे. खुद्द मुख्यमंत्र्यांनी या प्रकल्पाबाबत जाहीर रित्या स्पष्टोक्ती दिलेली आहे.”

रामराजेंचा ‘भांडाफोड’; एमआयडीसी नको म्हणून घेतली होती बैठक!

यावेळी रणजितसिंह यांनी विधानपरिषदेचे आमदार रामराजे नाईक निंबाळकर यांच्यावर गंभीर आरोप करत पुरावे सादर केले. ते म्हणाले, “श्रीमंत रामराजे नाईक निंबाळकर (Ramraje Naik Nimbalkar) यांनी विधानपरिषदेचे सभापती असताना त्यांच्या दालनात नाईकबोमवाडी एमआयडीसी रद्द किंवा स्थगित करावी, यासाठी बैठक आयोजित केली होती.” या बैठकीचा शासकीय वृत्तांतच रणजितसिंह यांनी पत्रकारांसमोर सादर केला. “येणाऱ्या एमआयडीसीमुळे युवकांच्या हाताला काम मिळणार आहे, मात्र केवळ राजकारण करण्यासाठी रामराजेंनी हा प्रकल्प हाणून पाडण्याचे प्रयत्न केले,” असा आरोप त्यांनी केला.

सह्याद्री कदमांवरही टीकास्त्र

“माजी आमदार स्वर्गीय चिमणराव कदम यांचा वारसा सांगणारे सह्याद्री कदम (Sahyadri Kadam) यांनीही साखरवाडीच्या सभेत नाईकबोमवाडी एमआयडीसी स्थगित करण्याची मागणी केली, याचे लाईव्ह रेकॉर्डिंग उपलब्ध आहे. ज्या चिमणराव कदम यांनी गिरवी रोडला ग्रामीण रुग्णालय सुरू केले, ते होऊ नये म्हणून ज्यांनी प्रयत्न केले, त्यांच्याच मांडीला मांडी लावून आज सह्याद्री कदम बसले आहेत,” असा घणाघात रणजितसिंह यांनी केला.

सुनेत्राताईंच्या निवडीकडे पाठ, रामराजेंची ‘अकृतज्ञता’ : शिवरूपराजे

यावेळी बोलताना श्रीमंत शिवरूपराजे खर्डेकर (Shivrupraje Khardekar) यांनी रामराजेंच्या भूमिकेवर संताप व्यक्त केला. “पवार कुटुंबीयांनी रामराजेंना कायम लाल दिव्याच्या गाडीत ठेवले, पक्षविरोधी काम करूनही आमदारकी अबाधित ठेवली. मात्र, स्व. अजितदादांच्या निधनानंतर त्यांच्या पत्नी श्रीमती सुनेत्राताई पवार (Sunetra Pawar) यांची गटनेतेपदी निवड होत असताना, त्या बैठकीला दांडी मारून रामराजे साखरवाडीत शिवसेनेचा प्रचार करत होते. ज्यांनी मोठे केले, त्यांच्याबद्दलची ‘माणुसकी’ आणि ‘कृतज्ञता’ विसरून ते राजकारण करत आहेत,” अशी टीका खर्डेकर यांनी केली.

सुरवडी एमआयडीसी आणि कमिन्सबद्दल ‘तात्यां’चा खुलासा

ज्येष्ठ नेते प्रल्हादराव साळुंखे-पाटील (Prahladrao Salunkhe-Patil) यांनी सुरवडी एमआयडीसीचा इतिहास उलगडला. ते म्हणाले, “ही राज्यातील एकमेव एमआयडीसी आहे जिथे शेतकऱ्यांच्या जमिनी देण्यासाठी मी स्वतः पुढाकार घेतला होता. तत्कालीन जिल्हाधिकारी ओमप्रकाश गुप्ता यांनी काळभैरव मंदिरात येऊन माझा सन्मान केला होता. जे नेते स्वतःला एमआयडीसीचे जनक म्हणतात, त्यांचा यात काहीही संबंध नाही. कमिन्स कंपनी (Cummins India) ही केवळ शरद पवार साहेबांच्या (Sharad Pawar) कृपेमुळे फलटणला आली आहे.”