पुणे पदवीधर निवडणूक; हर्षदा देशमुख-जाधवांची मोठी आघाडी
थेट WhatsApp वर मिळवा
पुणे पदवीधर निवडणुकीत प्रथम पसंतीची मतमोजणी पूर्ण झाली असून विजयाचा कोटा अपूर्ण आहे. हर्षदा देशमुख-जाधव यांनी स्मिता जाधव यांच्यावर आघाडी घेतली आहे.
स्थैर्य, पुणे, दि. २८ ऑक्टोबर : पुणे पदवीधर मतदारसंघाच्या निवडणुकीत प्रथम पसंतीच्या मतांची मोजणी पूर्ण झाली आहे. मात्र, कोणत्याही उमेदवाराला विजयासाठी आवश्यक असलेला १ लाख १३ हजार ९५ मतांचा कोटा पूर्ण करता न आल्याने पुढील पसंतीच्या मतांची मोजणी सुरू करण्यात आली आहे.
२१ व्या फेरीअखेर आघाडी
आतापर्यंत २१ व्या बाद फेरीची मतमोजणी पूर्ण झाली असून, राष्ट्रवादी काँग्रेस (शरद पवार पक्ष) च्या हर्षदा देशमुख-जाधव यांनी आघाडी घेतली आहे. त्यांना १ लाख ११ हजार २७९ मते मिळाली आहेत. त्यांच्या पाठोपाठ डॉ. स्मिता योगेश जाधव यांना १ लाख २ हजार ४२७ मते मिळाली आहेत. हर्षदा देशमुख-जाधव यांनी डॉ. स्मिता जाधव यांच्यावर ८ हजार ८५२ मतांची आघाडी घेतली असून विजयासाठी त्यांना आणखी १ हजार ८१६ मतांची आवश्यकता आहे.
इतर उमेदवारांची स्थिती
मतमोजणी प्रक्रियेत इतर उमेदवारांच्या मतांची आकडेवारीही स्पष्ट झाली आहे. यामध्ये शिवसेना (उद्धव बाळासाहेब ठाकरे पक्ष) चे सुनिल मोदी यांना ३ हजार ६६ मते मिळाली आहेत. सोमनाथ साळुंखे यांना २ हजार ६३८, नामदेवराव जाधव यांना १ हजार ९५५, तर लक्ष्मण हरणावळ यांना १ हजार ४७२ मते मिळाली आहेत. विजयाचा कोटा पूर्ण करण्यासाठी आता दुसऱ्या पसंतीच्या मतमोजणीकडे सर्वांचे लक्ष लागले आहे.
