पीएम किसानच्या यादीत नाव असूनही हप्ता अडकू शकतो; शेतकऱ्यांनी ही ३ कामे तातडीने करा

पीएम किसान योजनेच्या २४व्या हप्त्यापूर्वी e-KYC, आधार लिंकिंग आणि ॲग्रीस्टॅक नोंदणी पूर्ण करा. तांत्रिक त्रुटींमुळे २ हजार रुपये अडकण्याची शक्यता.

स्थैर्य, सातारा, दि. ०६ सप्टेंबर : प्रधानमंत्री किसान सन्मान निधी योजनेच्या २४व्या हप्त्याची वाट पाहणाऱ्या पात्र शेतकऱ्यांसाठी महत्त्वाची बातमी समोर आली आहे. लाभार्थी यादीत नाव समाविष्ट असूनही काही तांत्रिक त्रुटींमुळे २ हजार रुपयांचा हप्ता अडकण्याची दाट शक्यता निर्माण झाली आहे. त्यामुळे शेतकऱ्यांनी योजनेचा लाभ विनाअडथळा मिळवण्यासाठी तीन महत्त्वाच्या प्रक्रिया त्वरित पूर्ण करणे गरजेचे आहे.

e-KYC आणि आधार बँक खात्याशी लिंक करणे बंधनकारक

पीएम किसान योजनेचा हप्ता मिळवण्यासाठी e-KYC पूर्ण असणे अत्यंत आवश्यक आहे. ही प्रक्रिया पीएम किसान पोर्टल, मोबाईल ॲपद्वारे OTP वापरून किंवा सीएससी केंद्रावर बायोमेट्रिक पद्धतीने पूर्ण करता येते. तसेच योजनेची रक्कम थेट डीबीटीद्वारे जमा होत असल्याने बँक खात्याशी आधार कार्ड लिंक असणे आवश्यक आहे. खाते आधारशी लिंक नसल्यास त्वरित बँकेत जाऊन आधार सीडिंग करून घ्यावे.

ॲग्रीस्टॅक नोंदणी आणि योजनेच्या हप्त्याचे स्वरूप

शासकीय योजनांचा लाभ पारदर्शकपणे मिळण्यासाठी आता ॲग्रीस्टॅक नोंदणी आणि फार्मर आयडी अनिवार्य करण्यात आला आहे. या डिजिटल प्रणालीमुळे पीक विमा, विविध शासकीय अनुदान आणि कृषी योजनांचा लाभ घेणे सुलभ होते. या योजनेअंतर्गत पात्र शेतकऱ्यांना वर्षाला ६ हजार रुपये तीन समान हप्त्यांमध्ये दिले जातात. त्यामुळे शेतकऱ्यांनी आपल्या खात्याशी संबंधित या सर्व बाबी वेळेत तपासून पूर्ण कराव्यात.