फलटणमध्ये ५७ किमी पाणंद रस्ते आणि अतिक्रमणांबाबत मोठा निर्णय; आमदार सचिन पाटील यांच्या अधिकाऱ्यांना कडक सूचना
फलटण तालुक्यात ५७ किलोमीटर पाणंद रस्ते विकसित करण्यास मंजुरी मिळाली असून, अतिक्रमणे नियमित करून गरिबांना घरे देण्याचा महत्त्वपूर्ण निर्णय घेण्यात आला आहे.
स्थैर्य, फलटण, दि. १३ ऑगस्ट : फलटण पंचायत समितीच्या सभागृहात विविध शासकीय समित्यांच्या बैठकीत तालुक्यात ५७ किलोमीटर पाणंद रस्ते विकसित करणे आणि शासकीय जागेवरील अतिक्रमणे नियमित करण्याचा महत्त्वपूर्ण निर्णय घेण्यात आला. आमदार सचिन पाटील आणि माजी खासदार रणजितसिंह नाईक निंबाळकर यांच्या प्रमुख उपस्थितीत या आढावा बैठका पार पडल्या.
शेतकऱ्यांसाठी पाणंद रस्त्यांचा मार्ग मोकळा
मुख्यमंत्री बळीराजा पाणंद रस्ते योजनेअंतर्गत तालुक्यात ५७ किलोमीटरचे रस्ते विकसित करण्यासाठी निधी मंजूर झाला आहे. या मंजूर कामांचा दर्जा आणि गुणवत्ता राखण्याबाबत अधिकाऱ्यांना सूचना देण्यात आल्या आहेत. तसेच तालुक्यातील वहिवाटीचे सुमारे आठशे रस्ते विकसित करण्याबाबत सकारात्मक चर्चा झाली असून, ही कामे तातडीने पूर्ण करून शेतकऱ्यांचा प्रश्न मार्गी लावण्याचे निर्देश आमदार सचिन पाटील यांनी दिले.
अतिक्रमणे नियमित करून बेघरांना हक्काचे घर
शासकीय जागांवरील अतिक्रमणे नियमित करण्यासाठी गावनिहाय प्रस्तावांचा आढावा घेण्यात आला. ग्रामसेवक, तलाठी आणि मंडलाधिकारी यांनी तातडीने अतिक्रमणाचे प्रस्ताव दाखल करून नागरिकांना सहकार्य करावे, अशा सूचना देण्यात आल्या. या प्रक्रियेतून बेघर कुटुंबांना हक्काची जागा आणि घरकुल योजनेचा लाभ दिला जाणार आहे. या कामात कसूर करणाऱ्या अधिकाऱ्यांवर कडक कारवाई करण्याचा इशाराही यावेळी देण्यात आला.
आरोग्य सेवा आणि दलित वस्ती विकासावर भर
एकात्मिक आरोग्यवर्धिनी समितीच्या बैठकीत गरोदर महिलांची तपासणी, विविध शिबिरे आणि साथीच्या आजारांच्या नियंत्रणावर सविस्तर चर्चा झाली. नागरिकांना चोवीस तास तत्पर वैद्यकीय सेवा देण्याचे निर्देश आरोग्य विभागाला देण्यात आले. यासोबतच दक्षता समितीच्या बैठकीत दलित वस्तींच्या विकासासाठी निधी उपलब्ध करण्यावर चर्चा झाली. फलटण नगरपालिकेच्या सभागृहाला डॉ. बाबासाहेब आंबेडकर यांचे नाव देण्याच्या निर्णयाबद्दल समितीच्या वतीने अभिनंदनाचा ठराव करण्यात आला.
