महावितरणच्या मनमानी कारभारावर पालिकेचा कडक पवित्रा; थेट गुन्हे दाखल करण्याचा इशारा
थेट WhatsApp वर मिळवा
विनापरवाना कामे करणाऱ्या महावितरण आणि ठेकेदारांवर थेट कायदेशीर कारवाईचा इशारा देत फलटण पालिकेने रोडलाईटच्या स्मार्ट मीटर प्रश्नावरही तोडगा काढण्याचे पत्र धाडले.
स्थैर्य, फलटण, दि. १५ ऑक्टोबर : फलटण नगरपरिषद हद्दीत परवानगी न घेता मनमानीपणे वीज वाहिन्या, रोहित्र आणि खांब उभारणाऱ्या महावितरण विभाग तसेच संबंधित ठेकेदारांविरोधात भारतीय न्याय संहितेनुसार थेट गुन्हे दाखल करण्याचा कडक इशारा पालिकेने दिला आहे. नगराध्यक्ष समशेरसिंह नाईक निंबाळकर आणि मुख्याधिकारी निखिल जाधव यांनी महावितरणच्या कार्यकारी अभियंत्यांना पत्र पाठवून विनापरवाना सुरू असलेल्या कामांवर तीव्र आक्षेप नोंदवला.
विनापरवाना कामांवर कायदेशीर कारवाई
फलटण शहरात वाढती लोकसंख्या आणि व्यापारी विस्तार लक्षात घेऊन विकासकामे करताना अडथळे येऊ नयेत, यासाठी महावितरणने कोणतीही नवी कामे सुरू करण्यापूर्वी नगरपरिषदेचा ना हरकत दाखला (NOC) घेणे बंधनकारक करण्यात आले होते. तरीही महावितरणकडून नेमण्यात आलेले ठेकेदार कोणतीही परवानगी न घेता परस्पर कामे करत असल्याचा प्रकार समोर आला आहे. यापुढे अशी अनधिकृत कामे सुरू ठेवल्यास महावितरण आणि ठेकेदारांविरुद्ध गुन्हे दाखल करण्याचा इशारा पालिकेने दिला आहे.
रोडलाईट बिघाड दुरुस्तीसाठी वेळेत बदलाची मागणी
शहरातील पथदिव्यांसाठी महावितरणने बसवलेल्या स्वयंचलित स्मार्ट मीटरमुळे सायंकाळी ७:१५ ते सकाळी ७:०० या वेळेतच वीजपुरवठा सुरू राहतो. मात्र, हिवाळ्यात लवकर अंधार पडत असल्याने ही वेळ सायंकाळी ६:१५ ते सकाळी ६:१५ करण्याची मागणी पालिकेने केली आहे. तसेच दिवसा वीजपुरवठा बंद असल्याने लाईन फॉल्ट शोधण्यात अडचण येत असून दुरुस्तीला मोठा विलंब होत आहे. नागरिकांची गैरसोय टाळण्यासाठी दिवसा दुरुस्तीसाठी वीजपुरवठा उपलब्ध करून देण्याची तांत्रिक व्यवस्था करावी, अशी सूचना पत्राद्वारे करण्यात आली.
