मोठा फैसला: अल्पवयीन मुलीवरील अत्याचार प्रकरणात आरोपीला २० वर्षांची शिक्षा
फलटण तालुक्यातील एका अल्पवयीन मुलीवर अत्याचार करणाऱ्या आरोपीला फलटण अतिरिक्त जिल्हा व सत्र न्यायालयाने २० वर्षांच्या सक्तमजुरीची शिक्षा सुनावली आहे.
स्थैर्य, फलटण, दि. ४ जुलै : फलटण तालुक्यातील एका गावात येथे २०१८ मध्ये एका अल्पवयीन मुलीवर लैंगिक अत्याचार करून तिला जीवे मारण्याची धमकी देणाऱ्या दशरथ बनकर याला न्यायालयाने दोषी ठरवले आहे. फलटण येथील अतिरिक्त जिल्हा व सत्र न्यायालयाने या गंभीर प्रकरणात आरोपीला २० वर्षे सक्तमजुरीची आणि दंडाची शिक्षा सुनावली आहे.
अत्याचाराची गंभीर घटना
फलटण तालुक्यातील मे २०१८ मध्ये ही धक्कादायक घटना घडली होती. एकाने पीडित अल्पवयीन मुलीच्या घरात घुसून तिच्यावर जबरदस्तीने अत्याचार केले होते. तसेच, या घटनेबद्दल कोणाला सांगितल्यास कुटुंबाला जीवे मारण्याची धमकीही दिली होती. या अत्याचारामुळे पीडित मुलगी गर्भवती राहिल्यानंतर हा प्रकार उघडकीस आला.
न्यायालयात गुन्हा सिद्ध
या प्रकरणी फलटण ग्रामीण पोलीस स्टेशनमध्ये गुन्हा दाखल करण्यात आला होता. तत्कालीन पोलीस उपनिरीक्षक आर. आर. भोळ यांनी या गुन्ह्याचा सखोल तपास करून न्यायालयात दोषारोपपत्र दाखल केले. या खटल्याची सुनावणी अतिरिक्त जिल्हा व सत्र न्यायाधीश पी. जी. भोसले यांच्या न्यायालयात झाली. सरकारी पक्षातर्फे मिलिंद ओक आणि वैभव काटकर यांनी भक्कम युक्तिवाद केला.
२० वर्षांची कठोर शिक्षा
न्यायालयाने आठ साक्षीदारांच्या साक्षी, परिस्थितीजन्य पुरावे आणि सरकारी वकिलांचा युक्तिवाद ग्राह्य मानला. या आधारे न्यायालयाने संशयित आरोपीला बालकांचे लैंगिक अत्याचारापासून संरक्षण कायद्यांतर्गत दोषी ठरवून २० वर्षे सक्तमजुरी आणि ५०० रुपये दंडाची शिक्षा सुनावली आहे. दंड न भरल्यास अतिरिक्त १५ दिवसांची साधी कैद भोगावी लागणार आहे.
