फलटण: ब्राह्मण गल्लीतील विकासकामात अडथळे आणणाऱ्यांना ‘जशास तसे’ उत्तर देणार; नगरसेविका सिद्धाली शहा यांचा इशारा

फलटणमधील ब्राह्मण गल्लीत सुरू असलेल्या पिण्याच्या पाण्याच्या पाईपलाईन व रस्त्याच्या कामात काही विघ्नसंतोषी लोकांकडून अडथळे आणले जात असून, अशा प्रवृत्तींना सडेतोड उत्तर देण्याचा इशारा नगरसेविका सिद्धाली शहा यांनी दिला आहे.

स्थैर्य, फलटण, दि. 17 मे : फलटण शहरातील ब्राह्मण गल्ली येथे सार्वजनिक पाण्याची टाकी (हौद) ते एरंडे घराच्या बाजूने नवीन पाण्याची पाईपलाईन टाकण्याचे काम, तसेच सिमेंट काँक्रीटचा रस्ता करण्याचे महत्त्वपूर्ण कामकाज नगरसेविका कु. सिद्धाली अनुप शहा यांच्या विशेष प्रयत्नातून मंजूर करण्यात आले आहे. सध्या हे काम हाती घेण्यात आले असून, या भागातील सर्व नागरिकांना मुबलक पाणी मिळावे, यासाठी अत्यंत प्रामाणिकपणे हे काम सुरू आहे. मात्र, या लोकोपयोगी कामात जाणीवपूर्वक अडथळे आणले जात असल्याचा आरोप शहा यांनी केला आहे.

विकासकामात जाणीवपूर्वक अडथळे:

या विकासकामाबाबत माहिती देताना नगरसेविका कु. सिद्धाली शहा व माजी नगरसेवक अनुप शहा यांनी एका प्रसिद्धीपत्रकाद्वारे जोरदार टीका केली आहे. त्यांनी म्हटले आहे की, या लोकोपयोगी विकासकामात काही विघ्नसंतोषी लोकांकडून जाणीवपूर्वक अडथळे निर्माण केले जात आहेत. या भागात असणारे काही ‘स्वयंघोषित समाजसेवक’ आणि काही ‘पगारदार कार्यकर्ते’ या विकासकामात हेतुपुरस्सर विघ्न आणण्याचे काम करत आहेत.

काम पूर्ण करण्याचा ठाम निर्धार:

या सर्व राजकीय व विघ्नसंतोषी गोष्टींवर मात करून, नागरिकांच्या आग्रही मागणीखातर हे काम पूर्ण केलेच जाईल, असा ठाम विश्वास त्यांनी व्यक्त केला आहे. फलटणचे लोकनियुक्त नगराध्यक्ष समशेरसिंह नाईक-निंबाळकर यांच्या नेतृत्वाखाली आणि पाणीपुरवठा समितीचे सभापती राहुल निंबाळकर यांच्या माध्यमातून हे प्रलंबित कामकाज यशस्वीरीत्या पूर्ण केले जाईल, असे त्यांनी स्पष्ट केले.

विघ्न आणणाऱ्यांना सडेतोड उत्तर देणार:

शहराच्या आणि प्रभागाच्या विकासाशी कोणतीही तडजोड केली जाणार नाही. यापुढे शहराच्या विकासकामांत जे कोणी विघ्न आणतील, त्यांना ‘जशास तसे’ सडेतोड उत्तर दिले जाईल, असा स्पष्ट आणि खणखणीत इशारा नगरसेविका कु. सिद्धाली अनुप शहा आणि माजी नगरसेवक अनुप शहा यांनी दिला आहे. त्यांच्या या ठाम भूमिकेमुळे प्रभागातील नागरिकांमधून मोठे समाधान व्यक्त केले जात आहे.