विकासाचा ध्यास अन् जनसेवेचा वारसा; सिद्धाली अनुप शहा यांनी रणशिंग फुंकले!
स्थैर्य, फलटण, दि. १६ नोव्हेंबर : फलटण नगरपरिषदेच्या आगामी निवडणुकीच्या पार्श्वभूमीवर शहरातील राजकीय वातावरण आता चांगलेच तापू लागले आहे. प्रभाग क्रमांक ८ मधून भारतीय जनता पार्टीच्या (खासदार गट) अधिकृत उमेदवार म्हणून सिद्धाली अनुप शहा यांनी आपला उमेदवारी अर्ज आज मोठ्या उत्साहात दाखल केला. निवडणूक निर्णय अधिकारी तथा प्रांताधिकारी सौ. प्रियांका आंबेकर यांच्याकडे त्यांनी हा अर्ज सुपूर्द केला असून, यासह त्यांनी निवडणुकीच्या रिंगणात अधिकृतरीत्या प्रवेश केला आहे.
आज सकाळीच कार्यकर्त्यांच्या आणि समर्थकांच्या उपस्थितीत सिद्धाली शहा यांनी आपला उमेदवारी अर्ज दाखल करण्याची प्रक्रिया पूर्ण केली. यावेळी भारतीय जनता पार्टीच्या पदाधिकाऱ्यांची आणि प्रभागातील ज्येष्ठ नागरिकांची मोठी उपस्थिती होती. अर्ज दाखल करताना समर्थकांनी दिलेल्या घोषणांनी परिसर दुमदुमून गेला होता, ज्यामुळे भाजपच्या गोटात विजयाचा विश्वास अधिक दृढ झाल्याचे पाहायला मिळाले.
माजी खासदार रणजितसिंह नाईक निंबाळकर, आमदार सचिन पाटील आणि जिल्हा नियोजन समितीच्या सदस्या सौ. जिजामाला रणजितसिंह नाईक निंबाळकर यांच्या मार्गदर्शनाखाली आणि नेतृत्वात ही निवडणूक लढवली जात आहे. पक्षाने दाखवलेला विश्वास सार्थ ठरवण्यासाठी आणि प्रभागातील प्रलंबित प्रश्न मार्गी लावण्यासाठी आपण कटिबद्ध असल्याचे मत सिद्धाली शहा यांनी अर्ज दाखल केल्यानंतर व्यक्त केले.
फलटण नगरपरिषदेचे माजी विरोधी पक्षनेते अनुप शहा यांनी प्रभाग क्रमांक ८ मध्ये गेल्या काही वर्षांत सातत्याने जनसंपर्क ठेवत अनेक विकासकामे मार्गी लावली आहेत. त्यांच्या या कामाचा आणि जनसंपर्काचा वारसा पुढे नेण्याची जबाबदारी आता सिद्धाली शहा यांच्या खांद्यावर आली आहे. अनुप शहा यांच्या कामाच्या बळावर आणि स्वच्छ प्रतिमेमुळे मतदारांचा कौल आपल्याच बाजूने राहील, असा विश्वास शहा कुटुंबीयांनी व्यक्त केला आहे.
उमेदवारी अर्ज दाखल करताना सिद्धाली शहा म्हणाल्या की, “प्रभागाचा सर्वांगीण विकास हेच माझे मुख्य ध्येय आहे. केंद्र आणि राज्य शासनाच्या माध्यमातून येणारा निधी योग्य रितीने वापरून प्रभागाचा कायापालट करायचा आहे. मतदारांनी माझ्यावर दाखवलेला विश्वास मी माझ्या कामातून नक्कीच सिद्ध करेन.”
विशेष म्हणजे, या वेळी महिला समर्थकांची उपस्थिती लक्षणीय होती. अर्ज भरण्याच्या प्रक्रियेदरम्यान महिलांनी सिद्धाली शहा यांना शुभेच्छा दिल्या. प्रभागातील समस्यांची जाण असलेल्या आणि उच्चशिक्षित उमेदवार म्हणून सिद्धाली शहा यांच्याकडे पाहिले जात असल्याने विरोधकांसमोर मोठे आव्हान निर्माण झाले आहे.
निवडणूक निर्णय अधिकारी सौ. प्रियांका आंबेकर यांनी अर्ज स्वीकारल्यानंतर कायदेशीर प्रक्रियेची पूर्तता करण्यात आली. आता अर्ज छाननी आणि माघारीची प्रक्रिया झाल्यानंतर खऱ्या अर्थाने प्रचाराचा धुराळा उडणार आहे. मात्र, अर्ज दाखल करण्याच्या निमित्ताने सिद्धाली शहा यांनी केलेले शक्तिप्रदर्शन विरोधकांना विचार करायला लावणारे ठरले आहे.
एकीकडे अनुभवी नेतृत्वाचे मार्गदर्शन आणि दुसरीकडे तरुण रक्ताचा उत्साह, अशा संयोगामुळे प्रभाग क्रमांक ८ मधील ही लढत अत्यंत चुरशीची आणि लक्षवेधी ठरणार आहे. सिद्धाली अनुप शहा यांच्या उमेदवारीमुळे प्रभागातील गणिते बदलली असून, मतदारांचा कल कोणाकडे झुकणार हे पाहणे औत्सुक्याचे ठरणार आहे.
