कु. सिद्धाली शहा यांच्या कार्यालयातील ‘आधार कार्ड’ कॅम्पला उत्स्फूर्त प्रतिसाद; नागरिकांच्या मागणीनुसार आणखी दोन शनिवार शिबिराचे आयोजन!
थेट WhatsApp वर मिळवा
स्थैर्य, फलटण, दि. 3 मे : माऊली फाउंडेशन आणि फलटण पोस्ट ऑफिस यांच्या संयुक्त विद्यमाने नवनिर्वाचित नगरसेविका कु. सिद्धाली अनुप शहा यांच्या संपर्क कार्यालयात नुकताच आयोजित करण्यात आलेला ‘आधार कार्ड कॅम्प’ यशस्वीरीत्या संपन्न झाला. सर्वसामान्यांच्या सोयीसाठी आयोजित करण्यात आलेल्या या शिबिराला फलटणकर नागरिकांनी अत्यंत उत्स्फूर्त आणि उत्तम प्रतिसाद दिला.
मोफत आधार नोंदणी आणि दुरुस्तीची कामे मार्गी
या यशस्वी शिबिराबाबत अधिक माहिती देताना कु. सिद्धाली शहा यांनी सांगितले की, या कॅम्पमध्ये ६ महिन्यांच्या बालकांपासून ते १८ वर्षांपर्यंतच्या मुला-मुलींचे नवीन आधार कार्ड पूर्णपणे मोफत काढून देण्यात आले. त्याचबरोबर, ज्या नागरिकांच्या जुन्या आधार कार्डवर नावात, जन्मतारखेत, पत्त्यात किंवा फोटोत काही त्रुटी होत्या, अशा दुरुस्तीची आणि अद्ययावतीकरणाची (अपडेट) कामेही या शिबिराच्या माध्यमातून अत्यंत सुलभतेने करून देण्यात आली. एकाच छताखाली ही सुविधा मिळाल्याने नागरिकांचा वेळ आणि श्रम वाचले.
पुन्हा दोन शनिवार शिबिराचे आयोजन
पहिल्या शिबिराला मिळालेला नागरिकांचा वाढता प्रतिसाद आणि आधार कार्ड संदर्भातील वाढती मागणी लक्षात घेऊन, कु. सिद्धाली शहा यांनी हे शिबीर पुन्हा आयोजित करण्याचा महत्त्वपूर्ण निर्णय घेतला आहे. त्यानुसार आता येत्या शनिवार, दि. ९ मे आणि शनिवार, दि. १६ मे रोजी सकाळी १० वाजल्यापासून नगरसेविका कु. सिद्धाली शहा यांच्या संपर्क कार्यालयात हे शिबीर पुन्हा नव्याने संपन्न होणार आहे.
नागरिकांना सहभागाचे आवाहन
ज्या नागरिकांना वेळेअभावी नवीन आधार कार्ड काढणे किंवा जुन्या आधार कार्डमध्ये आवश्यक बदल करणे अद्याप शक्य झालेले नाही, त्यांनी या उपलब्ध संधीचा अवश्य लाभ घ्यावा. नागरिकांनी आपले नवीन आधार कार्ड काढून घेण्यासाठी तसेच जुन्या कार्डचे अद्ययावतीकरण करण्यासाठी या आगामी शिबिरास मोठ्या संख्येने उपस्थित राहावे, असे आवाहन कु. सिद्धाली शहा यांनी एका प्रसिद्धीपत्रकाद्वारे केले आहे.
