बेरोजगार उमेदवारांसाठी 12 ते 17 डिसेंबर रोजी राज्यस्तरीय ऑनलाईन महारोजगार मेळाव्याचे आयोजन
दैनिक स्थैर्य । दि. ०९ डिसेंबर २०२१ । सातारा । कौशल्य विकास रोजगार व उद्योजकता यांच्यामार्फत दि. 12 ते 17 डिसेंबर 2021 रोजी सुशिक्षित बेरोजगार उमेदवारांसाठी ऑनलाईन राज्यस्तरीय महारोजगार मेळाव्याचे आयोजन करण्यात आले आहे. सातारा जिल्ह्यातील तसेच जिल्ह्याबाहेर नोकरी इच्छूक उमेदवारांना रोजगार उपलब्ध होण्याच्या दृष्टीने सदर ऑनलाईन महारोजगार मेळावा आयोजित करण्यात आल्याची माहिती कौशल्य विकास, रोजगार व उद्योजकता सहायक आयुक्त सुनिल पवार यांनी दिली.
सध्या कोरोनाच्या प्रादुर्भावामुळे शासनाने जाहीर केलेल्या सोशल डिस्टन्सींगचे नियम व अटीचे पालन करुन ऑनलाईन रोजगार मेळाव्याचे आयोजन करण्यात आले आहे. लॉकडाऊन नंतर नव्याने व्यवसाय/उद्योग सुरु करताना जिल्ह्यातील आस्थापनामध्ये मोठया प्रमाणात मनुष्यबळाची गरज निर्माण झाली असून स्थानिक बेरोजगार उमेदवारांना रोजगार उपलब्ध होण्याच्या दृष्टीने ऑनलाईन महारोजगार मेळाव्याचे आयोजन करण्यात आले आहे.
या महारोजगार मेळाव्यात राज्यातील नामवंत उद्योजक/आस्थापनांमध्ये रिक्त असलेली विविध प्रकारची सर्वसाधारणपणे 10 वी, 12 वी आयटीआय, डिप्लोमा, पदवीधर तसेच बी.ई. व इतर व्यवसायिक शैक्षणिक पात्रतेच्या रिक्त पदांसह राज्यभरातून 25 हजार पेक्षा जास्त रिक्तपदांसाठी उद्योजक/आस्थापनांमार्फत https://rojgar.mahaswayam.gov.in या संकेतस्थळावर रिक्तपदे ऑनलाईन अधिसूचित करण्यात येत आहेत. या संधीचा लाभ घेण्यासाठी नोकरी इच्छूक युवक-युवतींनी या विभागाच्या www.rojgar.mahaswayam.gov.in या वेबसाईटला भेट द्यावी. होमपेजवरील नोकरी साधक लॉगीन मधून आपआपल्या युझर आयडी व पासवर्डच्या आधारे लॉगीन करावे. त्यानंतर पंडीत दीनदयाळ उपाध्याय जॉबफेअर या बटनावर क्लिक करुन त्यातील “STATE LEVEL MEGA JOB FAIR 2021” या रोजगार मेळाव्याची निवड करावी. यानंतर उद्योजकनिहाय त्यांच्याकडील रिक्तपदांची माहिती घ्यावी आणि आवश्यक पात्रताधारण करीत असल्याची खात्री करुन पदाची निवड करण्याची दक्षता घेऊन उपलब्ध असलेल्या रिक्तपदासाठी ऑनलाईन पध्दतीने आपला पसंतीक्रम नोंदवून या रोजगार मेळाव्यात सहभागी व्हावे. मेळाव्यात सहभागी झालेल्या उमेदवारांच्या मुलाखती व्हीडीओ कॉन्फरन्स अथवा टेलीफोन द्वारे ऑनलाईन घेण्यात येणार आहेत.
या राज्यस्तरीय ऑनलाईन महारोजगार मेळाव्यात जास्तीत जास्त बेरोजगार उमेदवारांनी https://rojgar.mahaswayam.gov.in या संकेतस्थळावर ऑनलाईन नोंदणी करुन जिल्हा कौशल्य विकास, रोजगार व उद्योजकता मार्गदर्शन केंद्र, नवीन प्रशासकीय इतारत, तळ मजला, एस.टी. स्टॅड जवळ, सातारा येथे प्रत्यक्ष भेटीद्वारे अथवा या कार्यालयाच्या 02162-239938 या दूरध्वनीवर संपर्क साधावा असे असे आवाहन सहायक आयुक्त श्री. पवार यांनी केले आहे.
