श्रीमंत मालोजीराजे शैक्षणिक संकुलात १ मे रोजी भव्य शेतकरी मेळाव्याचे आयोजन

दैनिक स्थैर्य | दि. २६ एप्रिल २०२३ | फलटण |
विधान परिषदेचे माजी सभापती तथा विद्यमान आमदार श्रीमंत रामराजेंच्या अमृत महोत्सवी वाढदिवसानिमित्त फलटण येथील श्रीमंत मालोजीराजे शैक्षणिक संकुल, शेतीशाळा परिसर येथे सोमवार, दि. १ मे २०२३ रोजी सकाळी १०.०० वाजता भव्य शेतकरी मेळाव्याचे आयोजन करण्यात आले आहे.

श्रीमंत शिवाजीराजे उद्यानविद्या महाविद्यालय व कृषी महाविद्यालय फलटण, श्रीराम सहकारी साखर कारखाना व श्री दत्त इंडिया प्रा.लि. साखरवाडी यांच्या संयुक्त विद्यमाने हा शेतकरी मेळावा होणार आहे.

यावेळी जिल्हा परिषदेचे माजी अध्यक्ष श्रीमंत संजीवराजे नाईक निंबाळकर उद्घाटक व प्रमुख पाहुणे म्हणून उपस्थित राहणार आहेत. मेळाव्याचे अध्यक्षस्थान श्रीराम सहकारी साखर कारखान्याचे चेअरमन बाळासाहेब शेंडे भूषविणार आहेत. यावेळी प्रमुख मार्गदर्शन सह्याद्री फार्मचे अध्यक्ष व व्यवस्थापकीय संचालक विलास शिंदे, प्रगतशील शेतकरी सौरभ कोकीळ हे करणार आहेत.

मेळाव्यास जिल्हा बँकेचे मुख्य कार्यकारी अधिकारी डॉ. राजेंद्र सरकाळे, फलटण एज्युकेशन सोसायटीचे प्रशासन अधिकारी अरविंद निकम, श्री दत्त इंडिया प्रा.लि. साखरवाडीचे उपाध्यक्ष मृत्यूंजय शिंदे यांची प्रमुख उपस्थिती राहणार आहे.

या मेळाव्याचा लाभ परिसरातील जास्तीत जास्त शेतकर्‍यांनी घ्यावा, असे आवाहन श्रीमंत शिवाजीराजे उद्यानविद्या महाविद्यालय व कृषी महाविद्यालयातर्फे करण्यात आले आहे.