फलटण: मुधोजी हायस्कूलचा दहावीचा निकाल ९३.७२ टक्के – मुलींची बाजी

मुधोजी हायस्कूल फलटणचा दहावीचा निकाल ९३.७२ टक्के लागला आहे. जान्हवी लांडगे व सई शिंदे यांनी ९६.४० टक्के मिळवत प्रथम क्रमांक पटकावला असून निकालात मुलींनी बाजी मारली आहे.

स्थैर्य, फलटण, दि. ०९ मे : महाराष्ट्र राज्य माध्यमिक व उच्च माध्यमिक शिक्षण मंडळामार्फत घेण्यात आलेल्या दहावी (SSC) परीक्षेचा निकाल नुकताच जाहीर झाला आहे. यामध्ये फलटण एज्युकेशन सोसायटीच्या मुधोजी हायस्कूलने उज्ज्वल निकालाची परंपरा कायम राखत ९३.७२ टक्के निकाल नोंदवला आहे. या निकालात मुलींनी घवघवीत यश मिळवत बाजी मारली आहे.

विद्यालयाचे एकूण ७३३ विद्यार्थी या परीक्षेला बसले होते. त्यापैकी ६८७ विद्यार्थी यशस्वीरीत्या उत्तीर्ण झाले आहेत. उत्तीर्ण विद्यार्थ्यांमध्ये १८५ विद्यार्थ्यांनी विशेष श्रेणी, २६० विद्यार्थ्यांनी प्रथम श्रेणी, १७९ विद्यार्थ्यांनी द्वितीय श्रेणी, तर ६३ विद्यार्थ्यांनी पास श्रेणीत यश संपादन केले आहे.

प्रशालेतील प्रथम तीन गुणवंत विद्यार्थी:

• प्रथम क्रमांक (संयुक्त): जान्हवी हंबीर लांडगे आणि सई रामदास शिंदे (४८२/५०० गुण, ९६.४० टक्के)

• द्वितीय क्रमांक: वेदांतिका विकास कणसे पाटील (४७२/५०० गुण, ९४.४० टक्के)

  

• तृतीय क्रमांक: श्रेया नितीन कदम (४६८/५०० गुण, ९३.६० टक्के)

गणित व संस्कृतमध्ये १०० पैकी १०० गुण:

या परीक्षेत विद्यालयाच्या विद्यार्थ्यांनी विषयनिहाय उल्लेखनीय कामगिरी केली आहे. सई रामदास शिंदे या विद्यार्थिनीने संस्कृत विषयात १०० पैकी १०० गुण मिळवले आहेत. तर गणित विषयात आर्यन रूपचंद शिंदे, आदित्य संदीप बोडके आणि मयंक स्वप्निल दोशी या तीन विद्यार्थ्यांनी १०० पैकी १०० गुण मिळवून उत्कृष्ट कामगिरी नोंदवली आहे.

सर्व गुणवत्ता प्राप्त विद्यार्थ्यांचे आणि त्यांना मार्गदर्शन करणाऱ्या शिक्षकांचे सर्व स्तरांतून कौतुक होत आहे. विधान परिषदेचे आमदार रामराजे नाईक निंबाळकर, माजी आमदार दीपकराव चव्हाण, कृषी उत्पन्न बाजार समितीचे सभापती रघुनाथराजे नाईक निंबाळकर, सातारा जिल्हा परिषदेचे माजी अध्यक्ष संजीवराजे नाईक निंबाळकर यांनी विद्यार्थ्यांचे अभिनंदन केले.

तसेच संस्थेचे प्रशासन अधिकारी अरविंद निकम, तपासणी अधिकारी दिलीप राजगुडा, सहायक तपासणी अधिकारी सुधीर अहिवळे, विद्यालयाचे प्राचार्य वसंतराव शेडगे, माध्यमिकचे उपप्राचार्य ए. वाय. ननवरे, ज्युनिअर कॉलेजचे उपप्राचार्य सोमनाथ माने, माध्यमिकचे पर्यवेक्षक रावसाहेब निंबाळकर, राजेंद्र नाळे, पर्यवेक्षिका पूजा पाटील यांच्यासह नियामक मंडळ, शाळा व्यवस्थापन समितीचे सदस्य आणि शिक्षक-शिक्षकेतर कर्मचाऱ्यांनी सर्व गुणवंत विद्यार्थ्यांचे अभिनंदन करून पुढील शैक्षणिक वाटचालीस शुभेच्छा दिल्या आहेत.