खेड ग्रामपंचायतीच्या सरपंचांवर मोठी कारवाई; आर्थिक गैरव्यवहारप्रकरणी पदावरून केले बडतर्फ

सातारा तालुक्यातील खेड ग्रामपंचायतीमध्ये झालेल्या १६ लाखांहून अधिक रुपयांच्या आर्थिक गैरव्यवहारप्रकरणी पुणे विभागीय आयुक्तांनी मोठी कारवाई केली आहे. याप्रकरणी सरपंच श्रीमती लता अशोक फरांदे यांना उर्वरित कालावधीसाठी सरपंच आणि ग्रामपंचायत सदस्यपदावरून पदच्युत (बडतर्फ) करण्याचे आदेश देण्यात आले आहेत.

 स्थैर्य, सातारा, दि. २५ : खेड (ता. जि. सातारा) ग्रामपंचायतीमधील विविध विकासकामांमध्ये झालेल्या आर्थिक अपहार आणि अनियमिततेप्रकरणी सरपंच श्रीमती लता अशोक फरांदे यांच्यावर मोठी कारवाई करण्यात आली आहे. पुणे विभागाचे विभागीय आयुक्त डॉ. चंद्रकांत पुलकुंडवार यांनी १४ मे २०२६ रोजी याबाबतचा आदेश पारित केला. ही कारवाई ‘महाराष्ट्र ग्रामपंचायत अधिनियम १९५८ च्या कलम ३९(१)’ अंतर्गत करण्यात आली आहे.

तक्रार आणि चौकशी प्रक्रिया:

• पुण्यातील रहिवासी अभिजित भागवत खेडकर, उल्हास कमलाकर अग्निहोत्री आणि अभिषेक सुभाष हरीदास यांनी या आर्थिक अपहाराबाबत तक्रार दाखल केली होती.

  

• या तक्रारीची दखल घेत सातारा जिल्हा परिषदेच्या मुख्य कार्यकारी अधिकाऱ्यांमार्फत चौकशी करण्यात आली. यासाठी जावळी पंचायत समितीच्या गट विकास अधिकाऱ्यांच्या अध्यक्षतेखाली चौकशी समिती गठीत करण्यात आली होती.

गैरव्यवहाराचे स्वरूप:

मुख्य कार्यकारी अधिकाऱ्यांनी सादर केलेल्या अंतिम अहवालानुसार खालील गंभीर बाबी उघडकीस आल्या:

• ग्रामपंचायतीच्या विविध विकास कामांमध्ये तब्बल १६ लाख २७ हजार १४३ रुपयांचा आर्थिक अपहार तसेच ५० हजार रुपयांची आर्थिक अनियमितता प्रथमदर्शनी आढळून आली.

• ग्रामनिधीतील खर्च, गटर बांधकाम, रस्ते दुरुस्ती, साफसफाई, चेंबर चोकअप काढणे आणि मुरमीकरण यांसारख्या कामांमध्ये कागदपत्रांतील विसंगती आढळली.

• निविदा प्रक्रियेमधील त्रुटी, रोकड नोंदवहीतील अपूर्ण नोंदी आणि कामांच्या तपशीलांमध्ये फेरफार झाल्याचेही निरीक्षण नोंदवण्यात आले.

जबाबदार अधिकारी आणि त्यांची स्थिती:

या संपूर्ण प्रकरणात सरपंच लता फरांदे, तत्कालीन ग्रामपंचायत अधिकारी अतुल जाधव आणि शाखा अभियंता एच. बी. चव्हाण यांना संयुक्तपणे जबाबदार धरण्यात आले आहे.

• यापैकी तत्कालीन ग्रामपंचायत अधिकारी अतुल जाधव यांना यापूर्वीच निलंबित करण्यात आले असून त्यांच्याविरुद्ध विभागीय चौकशी सुरू आहे.

• दरम्यान, सुनावणीच्या वेळी सरपंच लता फरांदे यांनी आपल्यावरील सर्व आरोप फेटाळून लावले होते, मात्र चौकशी अहवालातील निष्कर्षांनुसार विभागीय आयुक्तांनी त्यांच्यावर ही कारवाई केली आहे.